მარკო ტარდელი
მარკო ტარდელი (იტალ. Marco Tardelli; დ. 24 სექტემბერი, 1954, კარეჯინე) — იტალიელი ფეხბურთელი და მწვრთნელი. თამაშობდა ნახევარმცველის პოზიციაზე. სხვადასხვა დროს იცავდა „პიზას“, „კომოს“, „იუვენტუსის“, „ინტერის“, „სანქტ-გალენისა“ და იტალიის ეროვნული ნაკრების ღირსებას. იტალიის ხუთგზის ჩემპიონი, იტალიის თასის ორგზის მფლობელი, უეფა-ს თასის, თასების მფლობელთა თასის, უეფა-ს სუპერთასისა და ევროპის ჩემპიონთა თასის მფლობელი „იუვენტუსის“ შემადგენლობაში. 1982 წლის მსოფლიო ჩემპიონი, 1980 წლის ევროპის ჩემპიონატის, 1978 წლის არგენტინისა და 1986 წლის მექსიკის მსოფლიო ჩემპიონატების მონაწილე იტალიის ეროვნული ნაკრების შემადგენლობაში.[1][2][3][4][5][6][7][8][9]
პირადი მონაცემები | |||
---|---|---|---|
დაბადების თარიღი | 24 სექტემბერი, 1954 | ||
დაბადების ადგილი | კარეჯინე, იტალია | ||
სიმაღლე | 178 სმ. | ||
სათამაშო პოზიცია | საყრდენი ნახევარმცველი | ||
ახალგაზრდული კარიერა | |||
1970–1972 | სან-მარტინო დი პიზა | ||
პროფესიონალური კარიერა* | |||
წლები | გუნდი | მატჩი | (გოლი) |
1972–1974 | პიზა | 41 | (4) |
1974–1975 | კომო | 36 | (2) |
1975–1985 | იუვენტუსი | 259 | (35) |
1985–1987 | ინტერი | 43 | (2) |
1987–1988 | სანქტ-გალენი | 14 | (0) |
სულ | 393 | (43) | |
ეროვნული ნაკრები | |||
1976–1986 | იტალია | 81 | (6) |
სამწვრთნელო კარიერა | |||
1988–1990 | იტალია (16 წლ.) | ||
1990–1993 | იტალია (21 წლ.) | ||
1993–1995 | კომო | ||
1995–1996 | ჩეზენა | ||
1996–1997 | იტალია (თანაშემწე) | ||
1997 | იტალია (23 წლ.) | ||
1997–2000 | იტალია (21 წლ.) | ||
2000 | იტალიის ოლიმპიური ნაკრები | ||
2000–2001 | ინტერნაციონალე | ||
2002–2003 | ბარი | ||
2004 | ეგვიპტე | ||
2005 | არეცო | ||
2008–2013 | ირლანდია (თანაშემწე) | ||
* პროფესიონალურ კლუბებში გამოსვლა და გოლები მხოლოდ ეროვნული ლიგებისთვის იანგარიშება |
ითვლება თავისი დროის მსოფლიოს ერთ-ერთ საუკეთესო ფეხბურთელად და ერთ-ერთ უდიდეს იტალიელ ნახევარმცველად. გამოირჩეოდა მებრძოლი ხასიათით, თავდადებული თამაშითა და შეუპოვარი ბრძოლისუნარიანობით. თავისი დამაჯერებელი მოქმედებებითა და სტაბილური თამაშით, ყოველთვის საიმედო პარტნიორობას უწევდა თანაგუნდელებს. ტექნიკურად, ტაქტიკურად და ფსიქოლოგიურად მაღალ დონეზე მომზადებული, განსაკუთრებით სახიფათო ხდებოდა მეტოქეთათვის სატურნირო თვალსაზრისით გადამწყვეტ და პრინციპულ მატჩებში.[10][11] თანაბრად ძლიერად მოქმედებდა როგორც შეტევაში, ასევე დაცვაში.[12][13][14]
იტალიური ფეხბურთის წინაშე თვალსაჩინო დამსახურებისათვის, მის განვითარებასა და პოპულარიზაციის საქმეში შეტანილი განსაკუთრებული წვლილის, ასევე, სპორტული მიღწევების აღიარების ნიშნად 2015 წელს შეიყვანეს იტალიური ფეხბურთის დიდების დარბაზში (იტალ. La „Hall of Fame“ del calcio italiano).
კარიერა
საკლუბო კარიერა
მარკო ტარდელი ჩრდილოეთ ტოსკანაში, აპუანის ალპების აღმოსავლეთით მდებარე ლუკას პროვინციის კომუნა კარეჯინეში (იტალ. Careggine) დაიბადა. მომავალი მსოფლიო ჩემპიონი ფეხბურთში პირველ ნაბიჯებს „სან-მარტინო დი პიზას“ მოკრძალებულ გუნდში დგამს. მისი პროფესიონალური კარიერა კი 1972 წლიდან, სერია C-ს მონაწილე საფეხბურთო კლუბ „პიზაში“ იწყება, რომლის შემადგენლობაშიც 41 შეხვედრაში თამაშობს და 4 ბურთი გააქვს. 1974 წელს სერია B-ს გუნდში — „კომოში“ ინაცვლებს, სადაც 36 მატჩში იღებს მონაწილეობას და ორჯერ იღებს მეტოქეთა კარს. მომდევნო სეზონიდან იტალიის ყველა დროის ყველაზე ტიტულოვან კლუბს — ტურინის „იუვენტუსს“ უერთდება, სადაც ათი სეზონის განმავლობაში თამაშობს. ტურინელთა რიგებში, საერთო ჯამში სერია A-ს 259 მატჩში გამოდის მოედანზე და 35 გოლის გატანას ახერხებს. გუნდთან ერთად ეროვნული ჩემპიონატების, თასის გათამაშებისა და საერთაშორისო საკლუბო ტურნირების ფარგლებში — თერთმეტი ტიტულის მფლობელი ხდება. ამის შემდეგ „ინტერში“ გადადის, სადაც სერია A-ს 43 შეხვედრაში მონაწილეობს (2 გოლი). საფეხბურთო კარიერას 1988 წელს შვეიცარიულ „სანქტ-გალენში“ ასრულებს.[15]
სანაკრებო კარიერა
1976–1986 წლებში იტალიის ეროვნული ნაკრების ღირსებას იცავს, რომლის შემადგენლობაში 81 შეხვედრას ატარებს და 6 ბურთი გააქვს.[16]
სტატისტიკა
იტალია | ||
---|---|---|
წელი | მატჩი | გოლი |
1976 | 8 | 0 |
1977 | 7 | 0 |
1978 | 13 | 1 |
1979 | 4 | 2 |
1980 | 12 | 1 |
1981 | 6 | 0 |
1982 | 13 | 2 |
1983 | 4 | 0 |
1984 | 7 | 0 |
1985 | 6 | 0 |
1986 | 1 | 0 |
ჯამში | 81 | 6 |
სანაკრებო მატჩები
მსოფლიო ჩემპიონატებზე
ტარდელიმ მსოფლიო ჩემპიონატების 13 შეხვედრაში მიიღო მონაწილეობა და 2 გოლი გაიტანა.[19][20][21][22][23][24]
ჩემპ. | მასპინძელი | № | პოზიცია | შ | ბ | მ | ფ | წ | შედეგი |
---|---|---|---|---|---|---|---|---|---|
1978 | არგენტინა | 14 | ნახევარმცველი | 6 | 0 | 4 | 1 | 1 | |
1982 | ესპანეთი | 14 | ნახევარმცველი | 7 | 2 | 4 | 3 | 0 | |
1986 | მექსიკა | 15 | ნახევარმცველი | 0 | 0 | 0 | 0 | 0 |
მიღწევები
საკლუბო
- სერია A: 1976–77, 1977–78, 1980–81, 1981–82, 1983–84
- იტალიის თასი: 1978–79, 1982–83
- უეფა-ს თასი: 1976–77
- უეფა-ს თასების მფლობელთა თასი: 1983–84
- უეფა-ს სუპერთასი: 1984
- ევროპის ჩემპიონთა თასი: 1984–85
სანაკრებო
ინდივიდუალური
- უეფა-ს ოქროს საიუბილეო გამოკითხვა: №37
- ფიფა-ს ნაკრების წევრი: 1979[26]
- ევროპის ჩემპიონატის სიმბოლური ნაკრების წევრი: 1980[27]
- ევროპის ნაკრების წევრი: 1982[28]
- იტალიური ფეხბურთის დიდების დარბაზის წევრი: 2015[29]
ბიბლიოგრაფია
- კაკაბაძე, მიხეილ (1979). არგენტინის ცის ქვეშ. თბ.: საქ. კპ ცკ-ის გამ-ბა.
- კაკაბაძე, მიხეილ (1981). ოქროს ქალღმერთიდან ფიფა-ს თასამდე. თბ.: საქ. კპ ცკ-ის გამ-ბა.
- ფანჯიკიძე, გურამ (1979). არგენტინა, არგენტინა!. თბ.: გამ-ბა საბჭ. საქართველო.
- ფანჯიკიძე, გურამ (1982). ფორცა, იტალია!. თბ.: გამ-ბა საბჭ. საქართველო.
- გოდუაძე, ლაშა (2010). მსოფლიო თასის ისტორია (1930–2010). თბ.: გაზეთი „მსოფლიო სპორტი“.
- Glanville, Brian (2018). The Story of the World Cup. London: Faber. ციტირების თარიღი: 2018-12-16. დაარქივებული 2020-08-13 საიტზე Wayback Machine. ISBN 9780571325566
- Squires, David (2016). The Illustrated History of Football. Sydney: Random House. ISBN 1780895585
- Holt, Nick (2014). The Mammoth Book of the World Cup. London: Running Press Adult. ISBN 0762452242
- Witzig, Richard (2006). The Global Art of Soccer. Rio Branco: CusiBoy Publishing. ISBN 0977-66880-0
- Falcão, Paulo Roberto (2016). Brasil 82 — O time que perdeu a copa e conquistou o mundo. Rio Branco: AGE.
- Moretti, Claudio (2013). 1001 storie e curiosità sulla grande Juventus che dovresti conoscere. Roma: Newton Compton.
- Moretti, Claudio (2014). I campioni che hanno fatto grande la Juventus. Roma: Newton Compton.
რესურსები ინტერნეტში
- შეგიძლიათ იხილოთ მედიაფაილები თემაზე „მარკო ტარდელი“ ვიკისაწყობში.
- National Football Teams
- Calcio.com დაარქივებული 2018-12-24 საიტზე Wayback Machine.
- ForzaJuve.ru დაარქივებული 2017-02-04 საიტზე Wayback Machine.
- WorldFootball.net
- Juventus.Sportland24.ru
- Internet Movie Database