沙撈越
沙撈越(粵拼:saa1 lou1 jyut6;馬來文: Sarawak),又叫砂拉越[註 2],以前叫砂磱越、砂朥越、砂勞越、砂羅越、砂撈越或沙撈越,簡稱砂或者砂州。係馬來西亞喺婆羅洲嘅其中一個州,另一個係東北面沙巴州,亦係全馬面積最大嘅州。沙撈越北面包圍住汶萊,而東面同南面就係印尼嘅加里曼丹。沙撈越首府古晉,其他大埠包括美里、詩巫同民都魯。根據2019年人口普查,沙撈越州一共有2,810,000人[9]。
沙撈越 砂拉越 Sarawak[1] | |||
---|---|---|---|
馬來西亞州屬[註 1] | |||
| |||
綽號:犀鳥之鄉[2] Bumi Kenyalang | |||
格言:團結、勤勉、奉獻' Bersatu, Berusaha, Berbakti | |||
頌歌:《我的故鄉》[3] | |||
砂拉越 馬來西亞聯邦其他州屬 | |||
首府 | 古晉市 | ||
省份 | |||
政府[6][7] | |||
• 州元首 | 泰益瑪目 | ||
• 首席部長 | 阿邦佐哈里(砂盟土保黨) | ||
面積[8] | |||
• 總數 | 124,450 平方公里(48,050 平方英里) | ||
面積排名 | 第一名 | ||
人口(2018)[9] | |||
• 總數 | 2,792,000 | ||
• 排名 | 第四名 | ||
• 密度 | 22/平方公里(58/平方英里) | ||
居民稱謂 | 沙撈越人 | ||
人類發展指數 | |||
• HDI (2017) | 0.737 (高) (第12位) | ||
時區 | MST[10](UTC+8) | ||
郵政編碼 | 93xxx[11] 至 98xxx[12] | ||
電話區號 | 082 (古晉)、(三馬拉漢) 083 (斯里阿曼)、(木中) 084 (詩巫)、(加帛)、(泗里街)、(沐膠) 085 (美里)、(林夢)、(馬魯帝)、(老越) 086 (民都魯)、(布拉甲)[13] | ||
車牌 | QA 至 QK (古晉) QB (斯里阿曼) QC (三馬拉漢) QL (林夢) QM (美里) QP (加帛) QR (泗里街) QS (詩巫) QT (民都魯) QSG (沙撈越州政府)[14] | ||
汶萊帝國 | 15世紀–1841年[15] | ||
布魯克王朝 | 1841年–1946年 | ||
日本軍事佔領 | 1941年–1945年 | ||
英屬直轄殖民地 | 1946年–1963年 | ||
自治 | 1963年7月22號[16][17][18][19] | ||
馬來西亞協定[20] | 1963年9月16號a[21] | ||
網站 | 沙撈越嘅官方網站 | ||
a 儘管馬來西亞喺1963年9月16號開始存在,8月31號(馬來亞獨立日)仍然被選為馬來西亞獨立日。2010年以嚟,9月16號被認定做馬來西亞日。呢日係馬來西亞公共假期,為咗紀念北婆羅洲、馬來亞、沙撈越同埋新加坡以同等夥伴嘅地位參組馬來西亞。[22] |
地理上,沙撈越州喺婆羅洲西北,東北面同沙巴州相鄰,並以林夢省將汶萊呢個獨立國家隔成兩部分。沙撈越全境屬於熱帶雨林氣候,熱帶雨林密布,全州最高點係毛律山,有2,423米高。拉讓江發源地喺依蘭山脈,係沙撈越一條重要河流,亦係馬來西亞最長嘅河,佢支流上面嘅巴貢水電站係東南亞大型水電站之一。以洞穴系統而出名嘅姆祿山國家公園亦喺呢個州。
沙撈越州自然資源豐富,經濟發展好大程度上屬於外向出口型,特別係石油、天然氣、木材同油棕方面。另外,仲有製造業、能源同旅遊等產業。
沙撈越州喺行政、移民同司法制度上同馬來西亞半島其他州屬明顯唔同。沙撈越州嘅州元首叫「Yang di-Pertua Negeri」,而州政府首腦叫做「首席部長」。沙撈越州嘅政府架構同西敏制相似,喺國內擁有最早嘅州議會制度。
沙撈越州亦呈現富有代表性嘅民族特點、文化特色同多樣化語言。沙撈越州嘅官方語言係英語同馬來語,無規定官方宗教,馬來語係政府同半政府機構指定語言。另外,大多數政府同半政府機構信件上亦以三種語言——華、英、巫書寫,而英語就係民間通用語,喺商業活動中廣泛使用。
古晉嘅沙撈越博物館係婆羅洲歷史最悠久嘅博物館,裏面有展示沙撈越特色包括傳統樂器沙貝。為期三日嘅熱帶雨林世界音樂節(RWMF,古晉)亦喺沙撈越州舉行。同時呢個州亦係全馬唯一慶祝達雅豐收節嘅地方。
政區
省份
同馬來西亞半島其他州屬唔同嘅係,沙撈越州以下嘅第一級行政區係省(Bahagian),而唔係縣(Daerah)。每個省都由省長領導。截至2018年,沙撈越州一共有12個省[24][25]:
沙撈越州省份 | ||||||
---|---|---|---|---|---|---|
大區 | 中文省名 | 馬來文省名 | 省會 | 人口(2010年[26]) | 地方政府 | 面積(平方公里) |
中砂 | 木中省 | Bahagian Betong | 木中 | 108,225 | 木中縣議會、砂拉卓縣議會 | 4,180.8 |
中砂 | 民都魯省 | Bahagian Bintulu | 民都魯 | 219,529 | 民都魯省發展局 | 12,166.2 |
中砂 | 加帛省 | Bahagian Kapit | 加帛 | 112,762 | 加帛區議會、桑坡縣議會、布拉甲縣議會 | 38,932 |
南砂 | 古晉省 | Bahagian Kuching | 古晉 | 705,546 | 古晉南市市政廳、古晉北市市政局、巴達旺市議會、石隆門縣議會、倫樂縣議會 | 4,565.53 |
北砂 | 林夢省 | Bahagian Limbang | 林夢 | 86,571 | 林夢縣議會、老越縣議會 | 7,790 |
北砂 | 美里省 | Bahagian Miri | 美里 | 364,562 | 美里市政廳、馬魯帝縣議會、蘇必士縣議會 | 26,777 |
中砂 | 沐膠省 | Bahagian Mukah | 沐膠 | 106,931 | 拉叻沐膠縣議會、瑪都達佬縣議會 | 6,997.61 |
南砂 | 三馬拉漢省 | Bahagian Samarahan | 哥打三馬拉漢 | 155,183 | 哥打三馬拉漢市議會、實文然縣議會 | 2,927.5 |
中砂 | 泗里街省 | Bahagian Sarikei | 泗里街 | 145,200 | 泗里街縣議會、馬拉端如樓縣議會 | 4,332.4 |
南砂 | 西連省 | Bahagian Serian | 西連 | 91,599(唔包括新生村副縣) | 西連縣議會 | 2,039.9(唔包括新生村副縣) |
中砂 | 詩巫省 | Bahagian Sibu | 詩巫 | 299,768 | 詩巫市議會、詩巫鄉區縣議會、加拿逸縣議會 | 8,278. |
南砂 | 斯里阿曼省 | Bahagian Sri Aman | 成邦江 | 94,774 | 斯里阿曼縣議會、魯勃安都縣議會 | 5,466.25 |
縣
省以下分為由縣長領導嘅縣,縣以下又分為由沙撈越行政官(Sarawak Administrative Officer, SAO)領導嘅副縣。截至2015年,成個州一共分咗40個縣。砂州各個省、縣都設有發展官一職(Development Officer),發展官嘅職責係推行轄區嘅發展項目。沙撈越州各個省每一條村嘅村長(叫做ketua kampung或者penghulu)都係由州政府任命[24][25]。沙撈越州39個地方政府都係由沙撈越地方政府同社區發展部管轄之下[27]。沙撈越州各省、縣、副縣列表喺下面[8]:
省 | 縣 | 副縣 |
---|---|---|
古晉 | 古晉 | 巴達旺 |
石隆門 | ||
倫樂 | 三馬丹 | |
三馬拉漢 | 三馬拉漢 | |
阿沙再也 | 砂隆再也 | |
實文然 | 詩巫遙 | |
西連[4] | 西連 | 新生村 |
打必祿 | ||
斯里阿曼 | 斯里阿曼 | 龍芽 |
板督 | ||
魯勃安都 | 英吉利里 | |
木中 | 木中 | 實巴荷 |
寧木 | ||
砂拉卓 | 南嘉布都 | |
浮剎 | 裕南 | |
甲望 | 荷萬 | |
泗里街 | 泗里街 | |
馬拉端 | ||
如樓 | ||
巴幹 | ||
沐膠 | 沐膠 | 萬年煙 |
拉叻 | 烏也 | |
瑪都 | 伊幹 | |
達佬 | ||
丹絨瑪尼 | ||
詩巫 | 詩巫 | |
加拿逸 | ||
實蘭溝 | ||
加帛 | 加帛 | 南嘉摩利 |
桑坡 | ||
布拉甲 | 雙溪阿剎 | |
武吉瑪邦 | ||
民都魯 | 民都魯 | |
實包勿 | ||
達島 | ||
美里 | 美里 | 峇里奧(代管) |
馬魯帝 | 姆祿 | |
蘇必士 | 尼亞 | |
柏魯魯 | 丁查 | |
德朗烏山 | 弄拉瑪 | |
弄貝典 | ||
林夢 | 林夢 | 南嘉門達米 |
老越 | 順叻 | |
大老山 |
地理
沙撈越陸地總面積大約124,450平方公里,佔馬來西亞總面積大約37.5%,坐落喺北緯0度50分至5度、東經109度36分至115度40分之間[28]。呢個州擁有一大片具有豐富動植物物種嘅熱帶雨林[19]。
沙撈越州海岸線有750公里(470英里)長,其中北部海岸線隔斷住大約150公里海岸線屬於汶萊領土。沙撈越同加里曼丹之間由婆羅洲中央山脈隔開。呢啲山脈喺北部更加高聳,而最高最陡峭嘅係峇南河源頭附近,即係巴杜拉威山同姆祿山。而毛律山係沙撈越最高峰[19]。蘭卑爾山國家公園以各種形式瀑布而出名[29]。其中喺姆祿山國家公園嘅沙撈越洞廳係世界上最大地下洞穴大廳。呢個國家公園入面其他景點包括鹿洞,亦係世界上最大洞穴通道[30] 以及擁有東南亞最大洞穴系統嘅清水洞[31][32]。佢已經聯合國教科文組織評定為世界遺產[33]。
沙撈越一般分咗三個生態區。其中沿海地區地勢平坦,由沼澤、濕地同平原組成。沙撈越海灘包括古晉嘅巴西班讓海灘(Pasir Panjang)[34] 同埋達邁海灘(Damai Beach)、[35]民都魯嘅丹絨巴都海灘(Tanjung Batu Beach)[36] 同埋丹絨羅邦公園(Tanjung Lobang)[37] 同美里嘅夏威夷沙灘[38]。其中多數市鎮都喺沿海地帶或者河流側近,包括古晉(沙撈越河)同詩巫(拉讓江)嘅港口喺河流側近,距離海岸有一段距離。民都魯同美里坐落喺海岸線側近,面向南中國海。第三個區域係靠近加里曼丹北面嘅高山地帶。其中包括喺加拉畢高原嘅峇里奧、姆祿高原(Murut Highlands)嘅峇卡拉蘭同埋喺肯雅高原(Kenyah Highlands)嘅烏山阿包[19]。
沙撈越境入面主要河流有沙撈越河、魯巴河(Batang Lupar)、沙里巴斯河(Sungai Saribas)同拉讓江等。沙撈越河係流經古晉省嘅主要河流。拉讓江係馬來西亞最長嘅河流,佢嘅長度加埋支流巴類河總長度大約563公里。巴南河、林夢河同大老山河(Sungai Trusan)都係流入汶萊灣[19]。
沙撈越屬於熱帶雨林氣候,並有東北季風同西南季風兩個季風季節。東北季風喺11月至2月之間出現,帶嚟好多雨水,而西南季風嘅降雨量相對較少。除咗呢兩個季風,沙撈越全年氣候穩定。每日平均溫差大致上係由朝早嘅23 °C(73 °F)到下晝嘅32 °C(90 °F)。美里同沙撈越其他主要城市相比,擁有平均相對較低嘅平均氣溫,同時亦擁有最耐日照(每日超過6個鐘),而其他地區每日大約接收5-6個鐘日照。沙撈越濕度通常較高,大約68%,年降雨量處於330厘米(130英寸)同460厘米(180英寸)之間,一年有220日降雨[28]。石質土係構成沙撈越60%嘅土地,灰化土就佔土地面積大約12%。沖積層可以喺沿海同河岸地區揾到,而泥炭沼澤森林覆蓋咗沙撈越土地面積大約12%[28]。
沙撈越可以分成兩種地質,第一種地質係巽他板塊,由魯巴河發源(靠近詩里阿曼)並往西南延伸,形成沙撈越西南端。仲有一個係地槽區域,由魯巴河往東北延伸,形成沙撈越中部同北部地區。沙撈越南端最古老嘅巖石係片岩,由石炭紀同二疊紀時形成,而呢個區域最後生嘅火成岩係安山岩,主要喺古晉省三馬丹。沙撈越中部同北部地質係喺晚期白堊紀開始形成,主要石頭類型有頁岩、砂岩同燧石[28]。
- 姆祿山國家公園入面嘅尖峰石陣
- 沙撈越叢林
- 峇哥國家公園
- 由沙撈越觀望南中國海
生物多樣性
紅樹林同水椰林覆蓋住沙撈越海岸線。佢佔沙撈越森林總面積大約百分之二,集中喺古晉、泗里街、同林夢河口。常見樹木包括:巴哥(紅樹屬)、尼帕棕櫚(水椰)同尼紅樹(Oncosperma tigillarium)。涵蓋住沙撈越州林地16%泥炭沼澤森林主要集中喺美里南部同巴南谷。喺泥炭沼澤森林主要樹種有: 拉敏白木、梅蘭蒂(娑羅屬種類)同絨廣木(Dactylocladus stenostachys)。巽他荒原森林佔森林總面積大約百分之五,而龍腦香科樹林佔據山區[28]。部分植物已經畀人用嚟研究佢哋嘅藥性[39]。
世界範圍入面嘅高密度物種雨林亦喺沙撈越生長。呢個州有大約185種哺乳動物、530種鳥類、166種蛇、104種蜥蜴同113種兩棲動物。另外仲有19%哺乳動物、6%鳥、20%蛇同32%蜥蜴屬於特有物種。呢啲物種可以喺保護區入面揾到。沙撈越仲有2000種樹種、1000種蘭花、757種蕨類植物同260種棕櫚[40]。呢個州仲有瀕危絕種動物,其中包括婆羅洲象、長鼻猴、婆羅洲猩猩同犀牛[41][42][43][44][45]。馬當野生動物中心(Matang Wildlife Centre,喺庫巴國家公園)、實蒙古野生動物護育中心(Semenggoh Nature Reserve)同蘭紮恩地茂野生保護區[46] 以佢哋嘅猩猩保護計劃出名[47][48]。達郎沙當國家公園(Talang-Satang National Park)以海龜保護措施出名[49]。觀鳥活動可以喺唔同國家公園入面進行,包括姆魯山國家公園、蘭卑爾山國家公園、[50] 和西米拉遙國家公園。[51]美里-實務地珊瑚礁國家公園嘅珊瑚礁比較出名、[52] 同加丁山國家公園(Gunung Gading National Park)大王花比較出名[53]。峇哥國家公園,係沙撈越最舊嘅國家公園[54] 另一方面,巴達旺豬籠草花園(Padawan Pitcher Plant & Wild Orchid Centre)為佢嘅各種豬籠草著稱[55]。馬來犀鳥係沙撈越嘅雀仔[56]。
沙撈越州政府頒布若干法律,以保護森林同瀕危野生物種,其中包括1958年森林條例、[57] 1998年野生動物保護條例[58] 同沙撈越自然公園和自然保護區條例。[59] 受保護物種有猩猩、綠海龜、飛狐猴同管道犀鳥。根據1998年野生動物保護條例,沙撈越原居民被賦予權限來獵取有限野生動物,但唔應該擁有超過5公斤(11英磅)嘅肉[60]。沙撈越森林部喺1919年成立,以保護森林資源[61]。自從沙撈越伐木業喺國際社會受到批評,州政府決定縮減沙撈越森林部,又喺1995年創建沙撈越林業公司(SFC,Sarawak Forestry Corporation)[62][63]。沙撈越生物多樣性中心喺1997年成立,負責保存、保護、同維持生物多樣性長期發展[64]。
人口同族裔
根據2015年馬來西亞人口調查,沙撈越一共有2,636,000人,係馬來西亞人口第四多嘅行政區[9]。但係沙撈越面積好大,佢嘅人口密度亦係全馬來西亞最低,平均每平方千米只有20人。2000至2010年期間,平均每年人口增長率係1.8%[8]。 2014年,大約58%總人口住喺城市,其餘42%人口分佈喺農村地區[66]。2011年,沙撈越出生率為每一千人中16.3人,死亡率為每一千人中4.3人,嬰兒死亡率為一千個嬰兒中6.5人[67]。
沙撈越有超過40個民族(實際種族為29至36個,依家只係剩返29個種族),各自有自己語言、習俗同文化。主要城市或者市鎮嘅種族係馬來人、馬蘭諾人以及華人,仲有少部份由家鄉去城市打工嘅比達友人同伊班人[68]。沙撈越主要有六大種族,佢哋係伊班族、馬來人、華人、比達友族、馬蘭諾族同埋烏魯人[68]。其他少數民族有卡達央族、爪哇族、布吉人、毛律族同埋印度人[69]。沙撈越有超過15萬名登記咗嘅移民,佢哋大多從事種植業、製造業、建造業、服務業同農業[70]。而非法移民數量可能達32萬至35萬人[71]。
達雅族術語通常用嚟指伊班族同比達友族。呢啲術語通常喺民族主義嘅情況中使用[72]。2015年,馬來西亞聯邦政府承認「達雅族」係官方形式嘅術語。[73] 馬來西亞土著係指喺馬來西亞半島、沙撈越同沙巴嘅馬來人同其他土著群體。呢班人喺教育、就業、金融、政治有特權[74]。原居民(Orang Asal)係指馬來西亞所有土著群體唔包括馬來人[75]。
伊班族
沙撈越有745,400個伊班族人,係全婆羅洲最多[76]。伊班族亦叫海達雅族(Sea Dayaks)。大部份伊班族人信奉基督教。伊班族一開始住喺拉讓盆地附近,但係布魯克王朝軍事行動之後,伊班族續漸遷移到沙撈越北邊。伊班族傳統房屋多數係長屋,獵頭習俗盛行時,長屋亦係一個防禦單位。今日長屋仍然係家庭象徵式符號。以前伊班族會將人分為三等,分別係「有錢又勇敢嘅人」、「一般人」同埋「奴隸」。不過喺布魯克時期,伊班社群改組為正式職位,例如本固魯(社區領袖)同天猛公(最高酋長)[77]。伊班族仍然保留好多傳統習俗同信仰,例如死人節同豐收節[78]。
華人
中國商人喺公元六世紀左右第一次到沙撈越地區。依家嘅沙撈越華人好多群體係布魯克時期移民[19]。中國移民初期喺富含金礦嘅石隆門擔任勞工而唔係從事採礦,石隆門係19世紀上半葉沙撈越華人移民人數最多嘅地方[79]。1857年以劉善邦為首領嘅12華人礦工公司發起咗反對布魯克王朝嘅起義,但最終以失敗告終。將近有四千多名華人喺起義失敗之後畀人殺害,1861年石隆門只剩低4戶人家[79]。沙撈越華人中有好多唔同方言民系,包括廣府民系、福州民系、客家民系、閩南民系、潮州民系同興化民系。主要節日有中元節同新年,主要信奉佛教同基督教[80]。大部份古晉華人都住喺沙撈越河附近,亦係後來嘅古晉唐人街[81]。黃乃裳喺1901年帶住族人到詩巫定居,住喺拉讓江附近[82]。華人之來去美里嘅煤礦坑同油田工作[81]。沙撈越華人受過中國國民黨同之後中國共產黨影響[83],之後喺1963年接受沙撈越民族主義意識形態[84]。
馬來人
沙撈越馬來人傳統職業係漁民,佢哋以前沿河定居,依家多數搬入城市。從事職業遍布各行各業,其中銀製品、銅製品、木雕同紡織品比較出名[19]。有啲馬來人村莊喺瑪格麗塔堡附近河邊,古晉清真寺後面,以及山都望山山腳下面[85]。有關沙撈越馬來人由來,有幾個唔同理論。據說係布魯克第一次用呢個詞語嚟稱呼住喺海邊嘅沙撈越穆斯林原居民。不過又唔係所有沙撈越穆斯林都係馬來人,大部份馬蘭諾族亦信伊斯蘭教[86]。其他理論認為馬來人係喺馬來群島嚟(例如爪哇或者蘇門答臘)、中東,或者係文化同宗教改變之後嘅沙撈越原居民[87]。
馬蘭諾人
馬蘭諾人原本住喺沙撈越,其中大部份住喺木膠濱海小鎮[88],傳統上馬蘭諾人住喺高屋(tall house)度,之後馬蘭諾人適應馬來人生活後,住喺村莊嗰度。馬蘭諾人工作多半係漁夫、造船者同工匠。馬蘭諾人本來信仰係異教,會慶祝考爾節,但係依家多數馬蘭諾人係穆斯林[19][86][89]。
比達友族
比達友族主要住喺沙撈越南部,包括倫樂、石隆門、西連、巴達旺[90]。佢哋亦叫做陸達雅族因為傳統居住地喺石灰巖山區嘅陡峭。佢哋由幾個子族群組成,包括查格依、比亞達(Biatah)同瑟拉高(Selakau),但係各個子族群所講嘅方言並唔相通[91]。 所以佢哋嘅共同語言係英語同馬來語。佢哋亦因幾種樂器而著稱,例如巨大嘅鼓同被稱為pratuakng嘅竹製敲擊樂器。同伊班人一樣,比達友族傳統住喺長屋,但係佢哋亦建立巴洛(baruk)圓屋作為社區會議場所。大多數比達友族都係基督徒[19]。
烏魯人
烏魯人喺伊班語中意思係「住喺上遊嘅人」。呢個包括好多住喺沙撈越內陸上遊生活嘅部落,包括弄巴灣族、本南族、比薩揚人、肯雅族、加央族、加拉畢族同伯拉灣語族。[19] 佢哋以前曾經係獵頭族,大多住喺巴里奧、布拉甲、巴卡拉蘭同巴南河流域沿岸[92]。佢哋以壁畫同木雕裝飾長屋,亦以造船,珠飾同紋身著稱[19]。大多數烏魯人係基督教徒[19]。
宗教信仰
雖然伊斯蘭教係聯邦官方宗教,但係沙撈越州無官方宗教[94]。但係阿都拉曼耶谷就任首長期間,沙撈越州憲法被修訂,令到馬來西亞最高元首成為沙撈越嘅伊斯蘭教首領,並授權州議會通過關於伊斯蘭教事務法律。有咗呢種規定,沙撈越州可以制定任何伊斯蘭教政策,亦可以創立伊斯蘭政府機構。1978年伊斯蘭議會法案令到沙撈越州可以成立伊斯蘭法院,管轄範圍有婚姻、子女監護權、訂婚、繼承權,同埋刑事案件等範疇。 卡迪法院亦相繼建立[95]。
沙撈越係馬來西亞唯一一個基督徒人數超過穆斯林嘅州屬。1848年,英國國教會(聖公會)最早嚟到沙撈越宣教,之後到天主教會同1903年嘅衛理公會。基督教最初喺華人社群中流傳,然後先喺原本信泛靈論嘅土著間傳播[96]。沙撈越其他基督信仰宗派有婆羅洲福音教會(亦叫做Sidang Injil Borneo或者SIB)[97] 同浸禮宗[98]。原居民好似伊班族、比達友族同烏魯人都開始信基督宗教,雖然佢哋仲保留一啲傳統宗教儀式。好多穆斯林係馬來族、馬蘭諾族同卡揚族。馬來西亞華人主要信奉佛教、道教同中國民間信仰[99] 。沙撈越其他小規模宗教有巴哈伊信仰[100]、印度教[101]、錫克教[102] 同泛靈論[103]。
- 古晉聖約瑟教堂
- 舊沙撈越州清真寺
- 古晉鳳山寺
語言
1963年至1974年間,由於時任沙撈越州首席部長史蒂芬·甘隆寧甘反對喺沙撈越州使用馬來語,英語係沙撈越州唯一法定語言[104]。1974年,新任首席部長阿都拉曼耶谷採納馬來語同英語都係沙撈越州官方語言[95],並將學校教學語言由英語改為馬來語[105]。到依家,英語仍然喺法庭、州議會同部份政府機構中使用[106]。2015年11月18號,沙撈越首席部長阿德南宣佈,英語同馬來語共同列為沙撈越嘅官方語言[107]。
喺沙撈越州使用嘅馬來語亦叫做沙撈越語(Bahasa Sarawak)或者沙撈越馬來語,係沙撈越馬來人同其他土著主要使用語言。沙撈越語係一種同馬來西亞半島馬來語有唔同嘅方言。伊班語亦喺沙撈越34%人口中通用。比達友語設有6種主要方言,喺沙撈越10%人口中通用。烏魯族使用30種唔同方言。華人就主要用現代標準漢語,亦都用閩南語(普遍係泉漳話以及潮州話)、客家話同福州話等方言[108]。