Dorothy Malone

Mary Dorothy Maloney 1924ko urtarrilaren 29an jaio zen Chicagon, Illinoisen, Esther Emma "Eloise" Smithen eta Robert Ignatius Maloneyren bost umeetako bat izan zen. Haren bi ahizpak poliomielitisaren konplikazioen ondorioz hil ziren.

Sei hilabete zituenean, haren familia Dallasera (Texas) joan zen bizitzera. Dallasko Ursuline Akademian, Highland Park High Schoolen, Hockaday Junior Collegen eta, geroago, Southern Methodist Universityn ikasi zuen; erizain izatea zen haren asmoa. Bestalde, oso gazterik hasi zen modelo lanetan, Neiman Marcus saltegi handian.

18 urte zituelarik, RKO Picturesek kontratatu zuen. Gildersleeve on Broadway (1943) filmean debuta egon eta gero, urte berean paper txiki bat egin zuen The Falcon and the Co-eds-en. Frank Sinatra, Michèle Morgan eta Jack Haley protagonista zituen Higher & Higher musikalean ere lan egin zuen. 1944an, kontratu garrantzitsua sinatu zuen Warner Brothersekin.

Hasierako film gehienak B serieko westernak izan ziren, maila artistiko txikikoak. Hala ere, rol gogoangarri batzuk antzeztu zituen, hala nola, liburu arraroen dendako saltzailearena, Howard Hawksek zuzendutako The Big Sleep-en (1946) eta Dean Martinekin maitemindurik dagoen emakumearena, Artists and models komedia musikalean (1955). 1956an, ilehori platino bihurtu eta neska onaren irudia alde batera utzi zuen Written on the Wind melodraman, Douglas Sirken aginduetara, eta Rock Hudson, Lauren Bacall eta Robert Stacken alboan; taldeko emakumezko aktore onenaren Oscar saria jaso zuen lan horrengatik.^[2]

Arrakasta horren ostean, bestelako paperak eskaini zizkioten. Diana Barrymore hezurmamitu zuen Too Much, Too Soon-en, Errol Flynnen alboan, Man of a Thousand Faces-en James Cagneyrekin lan egin zuen, Henry Fonda eta Richard Widmarkekin Warlock-en, Rock Hudson eta Robert Stackekin The Tarnished Angels-en, Robert Stackekin The Last Voyage-en, eta Rock Hudsonekin berriro ere The Last Sunset-en.

Telebistarako lanek ere ospe handia eman zioten. 1964tik 1968ra, Peyton Place ABCren telesaileko protagonista izan zen, eta Irene Goodwinena egin zuen 1976ko Rich Man, Poor Man-ean. 1992an agertu zen hondarreko aldiz zineman , Basic Instinct filmean.

2018ko urtarrilaren 19an hil zen, 93 urte zituela.^[1]

Alderdi Demokratako kidea zen, eta Adlai Stevensonen aldeko kanpaina egin zuen 1952ko presidentziarako hauteskundeetan.

1959ko ekainaren 28an, Jacques Bergerac lapurtar aktorearekin ezkondu zen, Hong Kongen, non The Last Voyage filmatzen ari baitzen. Bi alaba izan zituzten, Mimi (1960an jaioa) eta Diane (1962an jaioa), eta 1964ko abenduaren 8an dibortziatu ziren.

1969ko apirilaren 3an, Robert Tomarkin New Yorkeko enpresaburu eta brokerrarekin ezkondu zen, Las Vegasko Silver Bells kaperan. Geroago, ezkontza baliorik gabe gelditzea lortu zuen, Tomarkin haren diruagatik bakarrik ezkondu zela argudiatu baitzuen.

1971ko urriaren 2an, Charles Huston Bell Dallasko motel kate bateko exekutiboarekin ezkondu zen; hiru urteren buruan dibortziatu ziren.

1971 aldean, Kaliforniako hegoaldetik Dallasko aldirietara eraman zituen alabak, berak haurtzaroa igaro zuen tokira, hain zuzen ere.