Z abo z (při pismikowanju: zet) je 23. a posledni pismik klasiskeho a 26. a runje tak posledni pismik moderneho łaćonskeho alfabeta kaž tež 33. a předposledni w hornjoserbskim alfabeće. Wón reprezentuje we wšelakich rěčach rozdźělnje wurjekowany konsonant. Jemu wotpowěduje grjekski zeta (Ζ, ζ) kaž tež pismik З resp. з w kyriliskim alfabeće. W Morsowym alfabeće zwoprawdźuje so Z přez − − · ·.
W najwjace rěčach, kiž jón wužiwaja, steji pismik za spěwny konsonant, nic pak w němčinje, hdźež wotpowěduje zwukej serbskeho c.
W serbšćinje je pismik ž wotwodźenka tutoho pismika. Delnjoserbšćina znaje nimo toho hišće pismik ź, kotryž w hornjoserbskej rěči jenož jako dźěl digrafa dź wustupuje.
