Hukuman mati

Kajahatan nan biasonyo dihukum mati adolah kajahatan taadok manusia lain, cando mambunuah, mambunuah massal, mamperkosa, mamperkosa anak, malecehkan anak sacaro seksual, terorisme, kajahatan parang, kajahatan taadok kamanusiaan, sarato genosida.^[1][2]

Hukuman mati dijatuahan pulo untuak kajahatan taadok nagara jo pamarintah, saroman bakianaik, mamato-matoi, mangasuik, marompak kapa, jo marompak kapatabang. Di babarapo nagara, hukuman ko dijatuahan pulo untuak urang-urang nan malakuan kajahatan samo baulang kali (residivisme), marompak sampai mati, manculik, atau kajahatan nan takaik jo narkotika.^[1][3]

48 nagara di dunia kini masih mamakai hukuman mati, 108 nagara alah maapuihnyo sacaro de jure untuak sadoalah macam kajahatan, 7 nagara maapuihnyo untuak kajahatan biaso tapi mampatahankannyo untuak kajahatan luar biaso, dan 28 nagara maapuihannyo sacaro total.^[4] Sakitar 60% dari panduduak di dunia tinggi di nagara nan masih mamakai hukuman mati, cando Cino, India,^[5] Amerika Sarikat,^[6] Indonesia,^[7] Pakistan, Bangladesh, Nigeria, Mesir, Arab Saudi, Iran, Japang,^[8] jo Taiwan.^[9] Kabanyakan nagara di Dunia Partamo alah maapuihan hukuman mati.^[10]

Manuurik Amnesty International, 20 nagara dikataui mangadoan eksekusi hukuman mati di tahun 2019.^[11] Babarapo nagara indak marilis informasi tantang eksekusinyo, cando Cino jo Korea Utara. Sakitar 1,000 tahanan dieksekusi pado tahun 2017.^[12]

Hukuman mati dianggap kontroversial di babarapo nagara, dan posisi tantang pamakaiannyo dalam satu ideologi politik atau konteks budaya amat baragam. Sajak baakhianyo Parang Dunia Kaduo, tadapek garakan untuak maapuihan hukuman mati.^[13]

Di Uni Eropa, Pasal 2 Piagam Hak Dasar Uni Eropa malarang pamakaian hukuman mati untuak nagara-nagara anggota UE.^[14] Dewan Eropa juo alah bausao untuak malarang pamakaian hukuman mati bagi nagara-nagara anggotanyo malalui Protokol 13 Konvensi Hak Asasi Manusia Eropa (ECHR). Namun, larangan ko anyo balaku pado nagara nan alah manandotangani dan maratifikasinyo, sainggo indak balaku pado nagara-nagara cando Armenia, Rusia, jo Azerbaijan.^[15][16]

Dari tahun 2007 inggo 2018, Majelis Umum Pasarikatan Banso-Banso alah mangaluakan babarapo resolusi nan indak maikaik sacaro hukum (non-binding resolution) untuak manangguahkan pamakaian hukuman mati di saluruah dunia, dan batujuan untuak maapuihnyo di saluruah dunia.^[17][18][19]

Bibliografi

• Michael H. Tonry (2000). The Handbook of Crime & Punishment. Oxford University Press. p. 3. ISBN 978-0-19-514060-6. https://books.google.com/books?id=7MePbzYyZ2YC&pg=PA3. 
• Elisabeth Reichert (2011). Social Work and Human Rights: A Foundation for Policy and Practice. Columbia University Press. p. 89. ISBN 978-0-231-52070-6. https://books.google.com/books?id=2LylU2Yp6NYC&pg=PA89. 
• Clifton D. Bryant; Dennis L. Peck (2009). Encyclopedia of Death & Human Experience. Sage Publications. p. 144. ISBN 978-1-4129-5178-4. https://books.google.com/books?id=LFOn7rpkVdQC&pg=PA144. 
• Cliff Roberson (2015). Constitutional Law and Criminal Justice, Second Edition. CRC Press. p. 188. ISBN 978-1-4987-2120-2. https://books.google.com/books?id=oHu9CgAAQBAJ&pg=PA188.