ორტვინული კულტურეფი
ორტვინული კულტურეფი — ოდიარე ჩანარეფი, ნამუეფსჷთ ოჭკომალო გჷმირინუანა. ორტვინული კულტურეფი ორხველჷ 10 ფანიას:
- ჯვაროსანეფი — ლუყუ, ჭარხალი, ჭახალი (დიხაშია), თალგამი, ბულეკი, თუთაშ ბულეკი, დონგი, წიწმარტი;
- ქორგამეფი — სტამფილო, მაკინდოლი, ჯინჯიჩე, სონა, ცეროცო;
- კოპეშიაშობურეფი — კოპეშია, კინტირი, შინკა, ხაბურზაკი;
- ჯოღორიშ მაჸურზენაიაშობურეფი — პამინდორი, ზაფანა, ფატიჯანი, ფიზალისი;
- პოპოქიშობურეფი — ხაჯი, ბარდონი, ლებია;
- შორიაშობურეფი — ხვარხვი, ნიორი, პურასქია, ჭლიკვი, ღანძგი, ძარხუხუ;
- რთულპიოლამეფი — სალათა, არდი, ზორმეხი, არტიშოკი, ტარხუნა;
- ჯიჯალეშობურეფი — ჭარხალი, ისპანახი;
- კამპეტიშობურეფი — რევანდი, ჭვახა (მაჟაველი);
- კაკალამეფი — გემუანი ლაიტი.
თელარაშ ხანგჷნძალაშ მეჯინათ გიშმართჷნა ართწანიან, ჟირწანიან დო მიარეწანიან ორტვინულ კულტურეფს. ოჭკომალო გჷმარინაფალი ორგანოფიშ მეჯინათ ორტვინული კულტურეფი 4 ბუნათ ირთჷნა: ფურცელამეფი — ლუყუ, კამა, მაკინდოლი, სალათა, ისპანახი დო შხვა; გუმნაღელამეფი — კინტირი, შინკა, ხაბურზაკი, პამინდორი, ფატიჯანი, ლებია, ლაიტი დო შხვა; ძირხვეფი — ჭახალი, ბულეკი, თუთაშ ბულეკი, სტამფილო, ჭარხალი დო შხვა; ბოქვამეფი — ხვარხვი, პურასქია, ნიორი. მიარეწანიან ჩანარეფს გიშმართჷნა ზოხო ბუნათ. ორტვინული კულტურეფი იკათუანს ვიტამინეფს, თაშნეშე ნოშქერწყარეფს, ცილებს, ციმუეფს. ხვარხვის, ნიორს, ბულეკის დო შხვა მიშმალ ფიტონციდეფს ახასიათენა ბაქტერიციდული მუშობურობეფი. დახე არძა ორტვინობა ანდაღებული ოკონსერვე მასალა რე. ორტვინული კულტურეფიშ უმენტაშობა ტროპიკული დო სუბტროპიკული წჷმოულობაშ რე, თინეფშე მიარე სიტიბაშ მოჸოროფე რე დო ოჸოფიერს (ფალიას) დო ლამე დიხას ოხვილჷ. საქორთუოს ორტვინული კულტურეფი ჯვეშშეჯვეშშე ფართოთ რე გოფაჩილი.
თაშნეშე ქოძირით
- გუმნაღელი (ჩანარი)
- ვეგეტარიანელობა
ლიტერატურა
- კვაჭაძე გ., ქორთული სხუნუეფიშ ენციკლოპედია, ტ. 2, ხს. 482—483, ქართი, 1977 წანა.
- Munro, Derek B., Small, E. 1997 Vegetables of Canada. NRC Research Press, Ottawa ISBN 978-0-660-19503-2
რესურსეფი ინტერნეტის
