Ubuntu

Ti Ubuntu (/ʊˈbʊntuː/ (dengngen) uu-BUUN-too)^[1] ket ti maysa distribusion ti Linux a naibatay iti Debian a kaaduan a buklen ti nawaya ken silulukat a taudan ti sopwer.^[2][3][4] Opisial a maipablaak ti Ubuntu kadagiti tallo nga edision: Desktop,^[5] Server,^[6] ken Core^[7] para kadagiti aparato ti Internet of things^[8] ken dagiti robot.^[9][10] Mabalin nga agmaymaysa a maipataray amin dagiti edision iti kompiuter, wenno iti maysa a birtual a makina.^[11] Nadayeg ti Ubuntu a sistema ti panangpaandar para iti cloud computing, nga agraman iti suporta manipud iti OpenStack.^[12] Ti kasisigud a desktop ti Ubuntu ket siguden a ti GNOME, manipud iti bersion 17.10.^[13]

Maipablak ti Ubuntu kada innem a bulan, nga agraman kadagiti napaut-termino a suporta (long-term support – LTS) kada dua a tawen.^[1][14][15] Manipud idi 22 Oktubre 2020, ti kaudian a pablaak ti napaut-termino a suporta ket 20.04 ("Focal Fossa"), a masuportaran aginggana intono 2025 babaen ti publiko a suporta ken aginggana intono 2030 kas maysa a mabayadan a pagpilian. Ti kaudian a pagalagadan a pablaak ket ti 20.10 ("Groovy Gorilla"), a masuportaran kadagiti siam a bulan.

Pinadur-as ti Ubuntu babaen ti Canonical,^[16] ken ti maysa a komunidad dagiti sabali nga agpadpadur-as, babaen ti maysa a meritokratiko a modelo ti panagturay.^[1][17] Mangipaay ti Canonical kadagiti panagpabaro ti seguridad ken suporta para iti tunggal maysa a pablaak, a mangrugi manipud iti petsa ti pannakaipablaak ken aginggana intono maabutan ti pablaak ti naidesignado a petsa ti patingga iti biag (end-of-life - EOL).^[1][18][19] Makapataud iti kuarta ti Canonical babaen ti panagako kadagiti premium a serbisio a mainaig iti Ubuntu.^[20][21]

Nanaganan ti Ubuntu manipud iti pilosopia ti Nguni iti ubuntu, nga ibaga ti Canonical a ti kayatna a sawen ket "sangkatauan kadagiti dadduma" nga agraman iti maysa a kaipapanan iti "Kastoyakon gapu iti amin a kasasaadtayo".^[1]