Душан Влаховиќ

Сметан за еден од најперспективните играчи на неговата генерација,^[1][2] тој е напаѓач со моќна фигура, надарен со извонредна техника, кој може да игра и како прв и како втор напаѓач.^[3] Има моќен и прецизен шут со неговата "левица" што му овозможува да постигнува многу голови во и надвор од шеснаесеттникот, но тој исто така е одличен изведувач на пенали и слободни удари.^[3]

Партизан

Влаховиќ започнал да игра фудбал во фудбалската школа Алтина од Земун.^[4] Потоа тој поминал три месеци во ОФК Белград, а одиграл и еден натпревар за јуниорите на Црвена ѕвезда.^[5][6]

Во летото 2014 година дошол во Партизан.^[7]

Својот прв професионален договор со Партизан го потпишал во февруари 2015, на само 15 години.^[8] На почетокот на 2016 година, Влаховиќ бил приклучен во првиот тим на Партизан под водство на тренерот Иван Томиќ и го зел дресот со број 9.^[9] Своето деби во првиот тим на Партизан го имал на 21 февруари 2016, во првенствениот натпревар против ОФК Белград. Тој се појавил во игра во 70-тата минута на местото на Исмаел Фофана, и така со 16 години и 24 дена станал најмладиот дебитант во историјата на клубот.^[10][11] Во следното коло, Влаховиќ добил шанса да заигра и во вечното дерби, влегувајќи од клупата во 53-тата минута на местото на Валери Божинов па така станал најмладиот дебитант во натпреварите од вечното дерби, престигнувајќи го рекордот кој претходно го држел Лука Јовиќ.^[12] Својот прв гол во дресот на Партизан го постигнал на 2 априла 2016, во првенствената победа на домашен терен над Радник Сурдулица со што станал најмладиот стрелец на гол во историјата на клубот (со 16 години, два месеци и пет дена).^[13][14] Исто така постигнал гол и во полуфиналето на Купот на Србија, на гостувањето против Спартак Суботица кога Партизан победил со 0-3.^[15] Во финалето на купот против Јавор Ивањица, во кое Партизан победил со 2-0, Влаховиќ повторно бил стрелец и го освоил својот прв трофеј во кариерата.^[16]

Дебито во европските натпреварувања, Влаховиќ го имал на 21 јули 2016, во реванш натпреварот од 2. коло на квалификациите за Лигата на Европа против Заглебје во Полска.^[17] Партизан бил елиминиран по изведување на пенали, па во остатокот од сезоната Влаховиќ играл само во домашните натпреварувања. Во второто коло од српското првенство, во натпреварот против Напредак на гости, Влаховиќ за првпат заиграл за Партизан као стартер.^[18] Вкупно во сезоната 2016-2017 одиграл девет натпревари (без постигнат гол), помагајќи им на црно-белите да ја освојат двојната круна.^[19]

Фјорентина

Во јуни 2017 година, италијанската Фјорентина официјално објавила дека го купила Влаховиќ од Партизан. Сепак, клубот од Фиренца навел во соопштението дека Влаховиќ нема да се приклучи веднаш во клубот, туку после 28 јануари 2018 кога ќе наполни 18 години.^[20] Официјалната промоција во Фјорентина, Влаховиќ ја имал на 22 февруари 2018 година, а право на настап за клубот од 1 јули 2018.^[21]

Во летото 2018, Влаховиќ и официјално и се приклучил на Фјорентина. Своето деби за виола го имал на 25 септември 2018, во 6. коло од Серија А, кога влегол во игра од клупата за резерви на местото на Марко Бенаси во 84-тата минута од натпреварот во кој неговиот тим бил поразен со 2-1 на гостувањето кај Интер.^[22][23] Така тој станал првиот играч роден во 2000 година или подоцна кој заиграл за Фјорентина во историјата на тосканците.^[24][25] Сезоната 2018-2019 ја завршил со вкупно 10 настапи за Фјорентина (сите во Серија А), а во текот на сезоната покрај за првиот тим играл и за примавера тимот на Фјорентина каде имал неколку блескави настапи.^[26]

На почетокот на сезоната 2019-2020, Влаховиќ ги постигнал својте први голови (два) во дресот на Фјорентина на 18 август 2019 во победата со 3-1 над Монца во Купот на Италија. Тој влегол во игра во 74-тата минута при водство на Монца од 1-0 и со два гола во 80-тата и 86-тата минута и асистенција за третиот кој го постигнал Федерико Кјеза го свртел резултатот и и овозможил на Фјорентина да мине во следната рунда.^[27] Својте први голови во Серија А ги постигнал на 10 ноември 2019 во поразот со 5-2 на гостувањето кај Каљари.^[28] На 15 декември 2019, Влаховиќ повторно бил стрелец влегувајќи од клупата, постигнувајќи го изедначувачкиот гол за Фјорентина по една соло акција во 92-рата минута од натпреварот против Интер на Артемио Франки што завршил 1-1.^[29][30] Сезоната ја завршил со 6 гола во 30 настапи во првенството.

Во сезоната 2020-2021, Влаховиќ го зел дресот со број девет, и нашол се повеќе простор играјќи како стартер, особено по доаѓањето на Чезаре Прандели на кормилото на клубот од Фиренца.^[31][32] На 22 декември 2020, тој го постигнал првиот гол по само три минути игра придонесувајќи за убедливиот успех во Торино против Јувентус (0-3), што значело прва победа на „виолетовите“ во домот на нивниот голем ривал после 12 години од последниот ваков успех.^[33][34] На 13 март 2021, тој го постигнал својот прв хет-трик во кариерата (станувајќи петти српски играч кој успеал тоа да го направи во Серија А), во првенствениот натпревар против Беневенто (1-4).^[35][36] Како сезоната се ближела кон самиот крај така растела формата на Влаховиќ; на 11 април напаѓачот постигнал два гола во поразот на неговата екипа на домашен терен од Аталанта (2-3), а на 25 истиот месец повторно бил стрелец против Јувентус реализирајќи пенал со паненка.^[37] Во мај, последниот месец од сезоната, Влаховиќ постигнал два гола во ремито 3-3 на гостувањето кај Болоња и уште два гола во победата со 2-0 на домашен терен против Лацио. Сепак и покрај одличната сезона на србинот кој постигнал 21 гол во првенството,^[36] Фјорентина имала уште една во низа разочарувачки сезони завршувајќи на 13-тото место. По завршувањето на првенството, Влаховиќ ја добил наградата за Најдобар млад фудбалер во Серија А.^[38]

Неговата добра форма продолжила и во сезоната 2021-2022, постигнувајќи гол во натпреварот од првото коло на Купот на Италија против Козенца (4-0).^[39] Својот прв гол во првенството го постигнал на 28 август 2021 против Торино.^[40] На 12 септември, тој постигнал два гола од пенал за Фјорентина во гостинската победа над Аталанта (1-2),^[41] додека, на 30 октомври, тој го постигнал својот втор хет-трик во италијанската најсилна дивизија против Специја (3-0).^[42] На 20 ноември, тој постигнал два гола во победата со 4-3 на домашен терен над лидерот на табелата Милан нанесувајќи им го првиот пораз во првенството.^[43] Под водството на новиот тренер Винченцо Италијано, Влаховиќ играл подобра сезона од претходната постигнувајќи 20 голови само во првиот дел од сеозната во 24 настапи во првенството и купот, што довело до огромен интерес за него од неколку големи европски клубови меѓу кои најзаинтересирани биле Арсенал и Јувентус.^[44][45]

Јувентус

На 28 јануари 2022, на својот 22-ри роденден, Влаховиќ потпишал за Јувентус за 70 милиони евра (плус 10 милиони евра во бонуси),^[46][47] откако го одбрал клубот од Торино пред Арсенал,^[48] кои исто така доставиле официјална понуда до Фјорентина и играчот. На 6 февруари, тој постигнал гол на своето деби во црно-белиот дрес, отворајќи го резултатот во првенствениот натпревар на домашен терен против Верона добиен со 2-0;^[49] четири дена подоцна, во првиот натпревар од Купот на Италија во дресот на Јувентус, во самата завршница по неговиот удар топката го погодила Руан Тресолди и завршила во мрежата, автогол кој им донел победа на бјанконерите од 2-1 над Сасуоло и пласман во полуфиналето.^[50] На 22 февруари, тој го имал своето деби во Лигата на шампионите, во првиот натпревар од осминафиналето на гостински терен против Виљареал (1-1):^[51] откако постигнал гол за 0-1 по само 32 секунди од почетокот на натпреварот, тој станал првиот играч на Јувентус кој постигнал гол на своето деби во нокаут фазата од Лигата на шампионите и втор најбрз, по Алесандро Дел Пјеро (20"), а исто така и втор најбрз стрелец на своето деби во ова натпреварување, заостанувајќи само зад Евгениј Конопљанка (19").^[52] Четири дена подоцна, тој постигнал два гола во победата на гости против Емполи (2-3).^[53]

Откако ги претставуваше селекциите на Србија под 15, под 16 и под 19 години, на 6 септември 2019 година, тој дебитирал за српската репрезентација под 21 година во поразот со 1-0 на гости против врсниците од Русија.^[54]

Своето деби во сениорската репрезентација го имал на 11 октомври 2020 година, на 20-годишна возраст, во поразот со 0-1 од Унгарија во Белград во УЕФА Лигата на нации.^[55] Последователно во истото натпреварување, на 18 ноември, играјќи за прв пат како стартер, тој го постигнал својот прв гол за државната репрезентација, во победата со 5-0 на домашен терен против Русија.^[56]

Хронологија на репрезентативните настапи

Хронологија на настапи и постигнати голови за националната селекција ― Србија
Дата	Град	Домашни	Резултат	Гости	Натпреварување	Голови	Инфо	Детали
11-10-2020	Белград	Србија	0 – 1	Унгарија	УЕФА Лига на нации 2020-2021 - Прва фаза	-	66'
14-10-2020	Истанбул	Турција	2 – 2	Србија	УЕФА Лига на нации 2020-2021 - Прва фаза	-	75'
15-11-2020	Будимпешта	Унгарија	1 – 1	Србија	УЕФА Лига на нации 2020-2021 - Прва фаза	-	79'
18-11-2020	Белград	Србија	5 – 0	Русија	УЕФА Лига на нации 2020-2021 - Прва фаза	1	60'
24-3-2021	Белград	Србија	3 – 2	Ирска	Квал. за СП 2022	1	82'
27-3-2021	Белград	Србија	2 – 2	Португалија	Квал. за СП 2022	-	46'
30-3-2021	Баку	Азербејџан	1 – 2	Србија	Квал. за СП 2022	-	86'
1-9-2021	Дебрецин	Катар	0 – 4	Србија	Пријателска	1
4-9-2021	Белград	Србија	4 – 1	Луксембург	Квал. за СП 2022	-	70'
7-9-2021	Даблин	Ирска	1 – 1	Србија	Квал. за СП 2022	-	70'
9-10-2021	Луксембург	Луксембург	0 – 1	Србија	Квал. за СП 2022	1
12-10-2021	Белград	Србија	3 – 1	Азербејџан	Квал. за СП 2022	2	88'
11-11-2021	Белград	Србија	4 – 0	Катар	Пријателска	1	46'
14-11-2021	Лисабон	Португалија	1 – 2	Србија	Квал. за СП 2022	-
Вкупно		Настапи	14		Голови	7

Клупска статистика

Статистиката е ажурирана на 15 декември 2019.

Сезона	Клуб	Првенство			Национален куп			Континентален куп			Останати купови			Вкупно
		Лига	Наст	Гол	Лига	Наст	Гол	Лига	Наст	Гол	Лига	Наст	Гол	Наст	Гол
2015-2016	Партизан	СЛ	14	1	КС	4	2	-	-	-	-	-	-	18	3
2016-2017		СЛ	7	0	КС	1	0	ЛЕ	1	0	-	-	-	9	0
Вкупно Партизан			21	1		5	2		1	0		-	-	27	3
2018-2019	Фјорентина	А	10	0	КИ	0	0	-	-	-	-	-	-	10	0
2019-2020		А	30	6	КИ	4	2	-	-	-	-	-	-	34	8
2020-2021		А	37	21	КИ	3	0	-	-	-	-	-	-	40	21
2021-јан. 2022		А	21	17	КИ	3	3	-	-	-	-	-	-	24	20
Вкупно Фјорентина			98	44		10	5		-	-		-	-	108	49
јан.-јун. 2022	Јувентус	А	15	7	КИ	4	1	ЛШ	2	1	СИ	-	-	21	9
2022-2023		А	3	3	КИ	0	0	ЛШ	0	0	-	-	-	3	3
Вкупно Јувентус			18	10		4	1		2	1		-	-	24	12
Вкупно во кариерата			137	55		19	8		3	1		-	-	159	64

Клупски

Партизан

• Суперлига на Србија : 1

2016–2017

• Куп на Србија : 2

2015–2016, 2016-2017

Индивидуални

• Серија А награди: 1

Најдобар млад играч: 2020-2021

• Најдобар стрелец во Купот на Италија: 1

2021-2022 (4 гола)

	Портал „Биографија“
	Портал „Фудбал“
	Портал „Србија“

• Душан Влаховиќ на soccerway
• Душан Влаховиќ на transfermakt
• Душан Влаховиќ на whoscored
• Душан Влаховиќ на espn