கூடாரம்

கூடாரங்கள் இரும்பு ஊழியின் தொடக்கத்திலிருந்து பயன்படுத்தப்படுகின்றன.^{[சான்று தேவை]} அவை விவிலியத்தில் குறிப்பிடப்பட்டுள்ளன. எடுத்துக்காட்டாக, தோற்றம் 4:20 இல் ஜபால் "ஆரம்பத்தில் கூடரங்களுக்குள் வாழ்ந்து ஆடுகளையும் செம்மறி ஆடுகளையும் வளர்த்ததாக" விவரிக்கின்றார். உருமானியப் படைகள் தோல் கூடாரங்களைப் பயன்படுத்தியது.^[3]

நாடோடிகள், பொழுதுபோக்கு முகாமிடுவோர், படைவீரர்கள், பேரழிவுகளால் பாதிக்கப்பட்டவர்கள் கூடாரங்களை வசிப்பிடமாகப் பயன்படுத்துகின்றனர். கூடாரங்கள் பொதுவாக திருவிழாக்கள், திருமணங்கள், கொல்லைப்புற விருந்துகள், முக்கிய நிறுவன நிகழ்வுகள், அகழ்வாராய்ச்சி, தொழில்துறைப் பணித் தங்குமிடமாகவும் பயன்படுத்தப்படுகின்றன.

பாரம்பரியம்

கூடாரங்கள் பாரம்பரியமாக உலகெங்கிலும் உள்ள நாடோடி மக்களால் குறிப்பாக அமெரிக்க முதற்குடிமக்கள், மங்கோலியன், துருக்கியர்கள் மற்றும் திபெத்திய நாடோடிகளால் பயன்படுத்தப்படுகின்றன.

இராணுவம்

படைகள் உலகெங்கிலும் நீண்ட காலமாக கூடாரங்கள் தங்கள் பணி வாழ்க்கையின் ஒரு பகுதியாக பயன்படுத்தப்படுகின்றன. பாரம்பரியமான தங்குமிடங்களுடன் ஒப்பிடும்போது, கூடாரங்கள் இராணுவத்தால் ஒப்பீட்டளவில் விரைவான அமைப்பிற்காக விரும்பப்படுகின்றன. உலகின் மிகப்பெரிய கூடாரங்களைப் பயன்படுத்துபவர்களில் அமெரிக்கப் பாதுகாப்புத் துறையும் ஒன்று. அமெரிக்கப் பாதுகாப்புத் துறை கூடாரத்தின் தரம் மற்றும் கூடார விவரக்குறிப்புகள் குறித்து கடுமையான விதிகளைக் கொண்டுள்ளது. இராணுவத்திற்கு மிகவும் பொதுவான கூடாரப் பயன்பாடுகள் தற்காலிக தடுப்பணைகள் (தூக்கக் குடியிருப்பு), சாப்பாட்டு வசதிகள், களத் தலைமையகம், நலன்புரி மற்றும் பொழுதுபோக்கு வசதிகள் மற்றும் பாதுகாப்பு சோதனைச் சாவடிகள் ஆகும். அமெரிக்க இராணுவம் வரிசைப்படுத்தக்கூடிய விரைவான அமைக்கும் தங்குமிடம் அல்லது டிராஷ் எனப்படும் நவீன கூடாரத்தைப் பயன்படுத்தத் தொடங்குகிறது. இது குளிரூட்டல் மற்றும் வெப்பமாக்கலுக்கான ஏற்பாடுகளைக் கொண்ட ஒரு மடக்கு கூடாரம் ஆகும்.^[4]

பொழுதுபோக்கு

முகாமிடுதல் என்பது பொழுதுபோக்கின் பிரபலமான வடிவமாகும், இது பெரும்பாலும் கூடாரங்களைப் பயன்படுத்துகிறது. ஒரு கூடாரம் அதன் பெயர்வுத்திறன் மற்றும் குறைந்த சுற்றுச்சூழல் தாக்கத்தால் பொருளாதார மற்றும் நடைமுறைக்குரிய முக்கியத்துவத்தைப் பெறுகின்றது. வனாந்தரத்தில் அல்லது பின்னணியில் பயன்படுத்தும்போது இந்த குணங்கள் அவசியமானதாகும்.

போர், பூகம்பம் மற்றும் தீ போன்ற மனிதாபிமான அவசரநிலைகளில் கூடாரங்கள் பெரும்பாலும் பயன்படுத்தப்படுகின்றன.எவ்வாறாயினும், சில நேரங்களில், இந்த தற்காலிக தங்குமிடங்கள் ஒரு நிரந்தர அல்லது அரை நிரந்தர வீடாக மாறும், குறிப்பாக இடம்பெயர்ந்த மக்கள் அகதிகள் முகாம் அல்லது சேரிப்புறங்களில் வசிப்பவர்களுக்கு, அவர்களுடைய முந்தைய இடத்திற்கு திரும்ப முடியாத சந்தர்ப்பங்களில் இது பயன்படும்.

எதிர்ப்பு இயக்கங்கள்

எதிர்ப்பு இயக்கங்களை நடாத்துபவர்கள் கூடாரங்களை தம் எதிர்ப்பின் அடையாளங்களாகப் பயன்படுத்தப்படுகின்றனர். 1968 ஆம் ஆண்டில் உயிர்த்தெழுதல் நகரம் என்ற பெயரில் வாஷிங்டனில் நூற்றுக்கணக்கான கூடாரங்கள் வறுமை எதிர்ப்பு பிரச்சாரகர்களால் அமைக்கப்பட்டது. இது எதிர்ப்பைக் காட்டும் குறியீடாக பயன்பட்டது .

• பொதுவகத்தில் Tents தொடர்பாக ஊடகக் கோப்புகள் உள்ளன.