Eratsun

Kokapena

Iruñeko merindadearen iparraldean dago, Iruñetik 62 kilometro ipar-mendebaldera. Goizuetarekin du muga iparraldean, Ezkurrarekin mendebaldean, Saldias eta Beintza-Labaienekin ekialdean, eta Basaburuarekin hegoaldean.^[5]

Herrira iristeko NA-170 errepidea hartu behar da, eta Zubieta eta Ezkurra herrien arteko bidegurutze batetik ateratzen den NA-4031 herri-errepidean sartu; errepide hori herriko plazan edo pilotaleku zaharrean amaitzen da.

Klima eta landaredia

Klima atlantiar ozeaniko epela da, anplitude termiko txikia eta prezipitazio ugariak dituena. Hilabete guztietan egiten du euri ugari, baita udan ere. Urteko batez besteko tenperatura 12-13 gradukoa da, eta prezipitazioak 1.600-2.000 mm bitartekoak. Urteko euri-egunak 180 inguru dira.^[5]

Pagadi zabalak daude udalerriaren hegoaldean eta Zumarrezta errekaren arroan. Horrez gain, herritik hurbilago, hariztiak eta gaztainadiakak daude. Kareharrizko lurzoru idorrenetan ametz ilaunduna hazten da.^[6]

Ezkurra errekak zeharkatzen du udal dermioaren hegoaldea, eta Zumarrezta errekak iparraldea. Ezkurra Bidaso ibaiaren adarra da, eta Zumarrezta Urumearena.

Mendiak

• Iruñarri
• Uztartza
• Zuperrori
• Irumugarrieta

1192an, Eratsungo, Saldiasko eta Beintza-Labaiengo gizonezko petxero bakoitzak urtean 4 soldata ordain zezan erabaki zuen Antso VI.a Jakituna Nafarroako erregeak; alargunek, etxean senarrik ez izanik, soldata bakarra; txerriak izanez gero, bakarra eman zezaten, bai gizonek, bai alargunek; eta ez zezaten beste inolako petxarik ordaindu. Herriak eiurdea ("eyurdea") izeneko petxa ordaindu zuen 1431 arte mendian bazkatzen ziren zerriengatik, baina urte hartan erregeak ordainsaria kendu eta behin betiko zentsu bilakatu zuen. 1460an, Martin Azpilikuetari eman zion erregeak Eratsunek ordaintzen zion behin betiko zentsua. 1633an, herriak hiru dukateko zentsua ordaintzen zion urtean errege ondareari, eta 170 dukaturen truke luditu zuen.^[7]

1562an, Altxortegiko Liburuaren arabera, hiru burdinola zeuden Eratsunen: Ollingoa, Zumarreztakoa eta Asurakoa.^[8] 1688an, Juan Bautista Alduntzin zen Zumarreztako eta Asurako burdinolen nagusia;^[9] 1713-1725 bitartean, berriz, Miguel Arizkun baztandarrak erosi zituen.^[10] Lehen Karlistaldia hasi baino lehen, Jose Antonio Muñagorrik errentan hartua zuen Zumarreztako ola (Herrería y fabrica de Bombas y Balas de Zumarrista).^[11] Gerran parte hartze garrantzisua izan ondoren -"Bakea eta Foruak" aldarriaren sortzailea izan zen-, gerraondoan buru-belarri lotu zitzaion burdinola ustiatzeari. 1841eko urrian, Esparteroren jarraitzaile amorratua zen Ramon Elorrio txapelgorrien teniente izandakoak soldadu batzuekin agertu eta atxilotu egin zuen. Berehala fusilatu zuten, Zumarreztatik hurbil dagoen Pillotasoro mendatean. Muñagorri erail zuten lekuan harrizko gurutze bat ezarri zuten oroigarri gisa.^[12]

1855eko maiatzaren 1eko desamortizazioaren legearen ondorioz, irina egiteko errota bat saldu zen 1863an.^[13].

• 
  Leitza eta Doneztebe arteko NA-170 errepidea. Ezkerretara, NA-4031 herri-errepideko bidegurutzea.
• 
  San Estanislao eliza.
• 
  San Joan eta San Paulo baseliza eta hilerria.
• 
  Iruñarriko zutarria; atzean Iruñarriko gailurra eta antenak.

Eratsungo biztanleria
Datu-iturria: www.ine.es

2008ko erroldaren arabera, ez zen etorkinik bizi herrian.

Udal hauteskundeak

2007an Pedro Antonio Deskarga Lizalde independentea aukeratu zuten alkate. Baliogabeko botoak zazpi izan ziren (emandako guztien %9,09) eta boto zuriak hamaika (%15,71). Abstentzioa %56,74koa izan zen.

2011n ere zerrenda bakarra aurkeztu zen, Latargi izenekoa. Alkate kargurako Francisco María Retegi Deskarga hautatu zuten; beste lau lagunekin batera udalbatza osatu zuen. Latargi izan zen zerrenda bakarra 2015ean ere, eta 56 boto jaso zituen. 2019an, Dagona Eratsun taldeko Iñaki Estanga Mitxelena hautatu zuten alkate.^[15]

Udaletxea

• HELBIDEA: San Millan kalea z/g

Alkateak

Leizaran Mariezcurrena autobus konpainiaren Doneztebe, Leitza eta Iruñea bitarteko lineak geltokia dauka herrian. Autobus lineak honako ibilbidea egiten du:

• Doneztebe - Elgorriaga - Ituren - Saldias - Eratsun - Ezkurra - Areso - Leitza - Lekunberri - Larraun - Irurtzun - Berriobeiti eta Iruñea

Eratsungo jaiak irailaren 8an ospatzen dira, Ama Birjinaren egunean.

• San Estanislao eliza. Estilo gotiko berantiarreko eraikina da. Latindar gurutzearen oinplanoa du, aurrealde zuzena, eta oinarri biribileko kanpandorrea.
• San Joan eta San Paulo baseliza. Erromaniko garaian datatua, gerora aski zaharberritua. Ez da erromeriarik egiten.

• Juan Inazio Retegi edo Retegi I.a (1943-), pilotaria.
• Julian Retegi edo Retegi II.a (1954-), garai guztietako pilotaririk onenetakoa.
• Iosu Baleztena (1982-), pilotaria.
• Iñaki Eskudero (1983-), pilotaria.
• Julen Retegi (1985-) edo Retegi Bi, pilotaria, Retegi II.aren semea.
• José María Retegi, pilotaria.

• Nafarroako udalerrien zerrenda