ஹோ சி மின் நகரம்

ஹோ சி மின் நகரம் (Ho Chi Minh City, வியட்நாமிய மொழி: Thành phố Hồ Chí Minh) என்பது வியட்நாமின் மிகப்பெரிய நகரமாகும். 17ம் நூற்றாண்டில் வியட்நாமுடன் இணைக்கப்படும் வரை இந்நகரம் கெமர் மொழியில் "பிறே நொக்கோர்" என்ற பெயரில் கம்போடியாவின் முக்கிய துறைமுக நகரமாக விளங்கியது. இது பின்னர் சாய்கோன் என்ற பெயரில் பிரெஞ்சுக் குடியேற்ற நாடான கோச்சின்சீனாவின் தலைநகராக விளங்கியது. 1954 முதல் 1975 வரையில் தென் வியட்நாமின் தலைநகராக இருந்தது. மே 1, 1975 இல், சாய்கோன் அதன் அயல் மாகாணமான 'கியா டின்' உடன் இணைக்கப்பட்டு வியட்நாமியக் கம்யூனிசத் தலைவர் ஹோ சி மின் அவர்களின் நினைவாக ஹோ சி மின் நகரம் எனப் பெயரிடப்பட்டது. ஆனாலும் நகரின் குடிமக்கள் பலரால் இன்னமும் இது "சாய்கோன்" என்ற பெயரிலேயே அழைக்கப்படுகிறது^[1].

நகரின் நடுப்பகுதி சாய்கோன் ஆற்றுக் கரையில் உள்ளது. தென் சீனக் கடலில் இருந்து 60 கிலோமீட்டர் (37 மை) தூரத்திலும்^[2] வியட்நாமின் தலைநகர் ஹனோய் நகரில் இருந்து 1,760 கிலோமீட்டர் (1,094 மை) தூரத்தில் உள்ளது.