லூயி டே பிராய்
லூயி டே பிராய் (Louis de Broglie) (15 ஆகத்து 1892 - 19 மார்ச்சு 1987) ஒரு பிரஞ்சு இயற்பியலாளர். 1924ஆம் ஆண்டு தனது முனைவர் பட்டத்திற்காக எதிர்மின்னிகளின் அலை இயல்புகளை பற்றி ஆய்வு செய்தார். இதைத் தொடர்ந்து, 'எதிர்மின்னிகளின் அலை இயல்பினைக் கண்டுபிடித்ததற்காக" அவருக்கு 1929ஆம் ஆண்டு இயற்பியலுக்கான நோபல் பரிசு அளிக்கப்பட்டது.
| லூயி டே பிராய் | |
|---|---|
 | |
| பிறப்பு | 15 ஆகத்து 1892 தியப், பிரான்சு |
| இறப்பு | 19 மார்ச்சு 1987 (அகவை 94) லவ்சினீஸ்,[1] France |
| தேசியம் | பிரெஞ்சு |
| துறை | இயற்பியல் |
| பணியிடங்கள் | சோர்போன் பாரிஸ் பல்கலைக்கழகம் |
| கல்வி கற்ற இடங்கள் | சோர்போன் |
| அறியப்படுவது | எதிர்மின்னிகளின் அலை இயல்பு டி புறாக்ளி அலை |
| விருதுகள் | இயற்பியலுக்கான நோபல் பரிசு (1929) கலிங்கா விருது (1952) |
வாழ்க்கை வரலாறு
கல்வியும் இராணுவப் பணியும்
லூயி டே பிராய் பிரான்சு நாட்டின் தியப் என்ற ஊரில் பிறந்தார்.[1] பள்ளிப்படிப்பிற்குப் பிறகு தமக்கையின் தூண்டுதலால் ஆட்சிப்பணியில் சேரும் விருப்பத்தோடு சோர்போன் பல்கலையில் முதலில் வரலாற்றுப் பிரிவையும் பின்னர் சட்டப்பிரிவையும் எடுத்துப் பயின்றார். ஆனால், அவரது அண்ணன் மாரிசு டே பிராயினால் கவரப்பட்டு 1910-இல் இயற்பிலைப் படிக்கத் தொடங்கினார். 1914இலிருந்து 1918 வரை இராணுவத்தில் பணியாற்றினார்; அங்கு அவரது ஓய்வு நேரத்தில், தொழில்நுட்பச் சிக்கல்களைத் தீர்ப்பது குறித்து கவனம் செலுத்தினார்.[2]
ஆய்வு
படைப்பணியிலிருந்து திரும்பிய பிறகு கருத்தியற்பியலில், குறிப்பாக குவாண்டம் பற்றிய புதிர்களை ஆராய்வதில் தீவிரமாக ஈடுபட்டார். அதன் பலனாக 1924இல் பாரிசு பல்கலைக்கழகத்தின் அறிவியல் புலத்தில், குவாண்டம் கொள்கையில் ஆய்வுகள் என்ற தலைப்பு கொண்ட ஆராய்ச்சிக்காக முனைவர் பட்டதைப் பெற்றார்.[3] லூயியின் எதிர்மின்னி அலைகள் கொள்கையை ஆல்பர்ட் ஐன்ஸ்டைன் வெகுவாகப் பாராட்டினார்.[4] பின்னர் (1927) இக்கருத்து டேவிசன்-ஜெர்மர் ஆய்வின் மூலம் நிரூபிக்கப்பட்டது. மேலும், பருப்பொருள்களின் அலைத்தன்மையின் அடிப்படையில் ஆஸ்திரிய நாட்டு இயற்பியலாளரான எர்வின் சுரோடிங்கர் அலை இயங்கியலைத் தோற்றுவித்தார்.[5]