Բիլլի Այլիշ

Այլիշը ծնվել է 2001 թվականի դեկտեմբերի 18-ին Կալիֆոռնիա նահանգի Լոս Անջելես քաղաքում^[10]՝ դերասաններ և երաժիշտներ Մեգի Բեյրդի և Պատրիկ Օ'Քոնելի ընտանիքում^{[11][12][13][14]}։ Նա իռլանդական և շոտլանդական արմատներ ունի^[15][16]։ Այլիշը ծնվել է արտամարմնային բեղմնավորման միջոցով^[17]։ Նա մեծացել է Լոս Անջելեսի Highland Park համայնքում^[18][19]։ Բիլլին տնային կրթություն է ստացել, նրա մայրը երգեր գրելու հիմունքներ էր դասավանդում ինչպես իրեն, այդպես էլ Ֆինիսին^[20]։ Այլիշը և Ֆինիսը միասին աշխատում էին որոշ երաժշտության վրա այն ժամանակ, երբ Ֆինիսը գրում և պրոդյուսերավորում էր իր սեփական երգերն իր խմբի հետ^[14]։ Այլիշն անվանել է եղբորը և մորն իր երաժշտության համար ոգեշնչման աղբյուրներ^[21]։ Նրանց ծնողները ներշնչում էին իրենց երեխաներին արտահայտվել և ուսումնասիրել ամեն ինչ, ինչ ցանկանում են, ներառյալ արվեստը և դերասանական վարպետությունը^[13][20]։ Այլիշը գրել է իր առաջին «իրական» երգը 11 տարեկանում՝ իր մոր երգերի հեղինակության դասին։ Երգը զոմբի ապոկալիպսիսի մասին է։ Նա ներշնչվել է «Քայլող մեռյալները» հեռուստասերիալից, որտեղից նա տարբեր տողեր և սերիաների անվանումներ էր վերցնում և ընդգրկում երգում^[21][22]։ Այլիշը մասնակցել է մի քանի դերասանական լսումների, որոնք չի հավանել։ Սակայն, նա հաճույք էր ստանում, ձայնագրելով աննշան երկխոսություններ և աշխատել է այնպիսի ֆիլմերում, ինչպիսիք են «Ռամոնա և Բիզուս»-ը, «Իքս մարդիկ»-ը և «Թույլակի օրագիր»-ը^[20]։ Նա ելույթ է ունեցել տաղանդների շոուում և միացել Լոս Անջելեսի երեխաների երգչախմբին 8 տարեկան հասակում^[20]։ Իր խոսքով՝ ամենամոտ ընկերն է հայտնի տիկտոկեր Բուլլ Դոգգովը։

2015-2017․ «Don't Smile at Me»

2015 թվականի հոկտեմբերին, Այլիշը ձայնագրել է «Ocean Eyes» երգը, որի հեղինակը և պրոդյուսերը Ֆինիսն էր։ Վերջինս ի սկզբանե գրում էր երգն իր խմբի համար, սակայն, Բիլլիի պարերի ուսուցիչը խնդրել է նրանց երգ ձայնագրել պարերի համար։ Նրանք թողարկել են երգը SoundCloud-ում, ինչպես արդեն արել էին որոշ ձայնագրած երգերի հետ^[23][24]։ Եվ ձայնագրությունը, և Այլիշը բարձր գնահատականներ և գովազդ են ստացել տարբեր մեդիա գործիչների կողմից, ներառյալ ռադիոկայանները և երաժշտական տարբեր անձանց, օրինակ․ Beats 1-ի, KCRW-ի, BBC One-ի, Զեյն Լոուիի, Ջեյսոն Քրամերի, Էնի Մաքի և Քրիս Դուրիդասի կողմից^[28]։

Ֆինիսի մենեջերը քննարկել է վերջինիս հետ Այլիշի պոտենցիալը «Ocean Eyes» երգից հետո^[29]։ Ֆինիսի կողմից համաձայնությամբ Apple Music-ը պայմանագիր է կնքել Այլիշի և A&R-ի Platoon ընկերության հետ, որն օգնում է պատրաստել արտիստներին ավելի խոշոր լեյբլերի հետ աշխատելու համար։ Այլիշն այն ժամանակ կապ է հաստատել Chanel նորաձևության ընկերության և ոճաբանի հետ, որոնք օգնել են նրան կազմել իր իմիջը։

«Ocean Eyes»-ի համար երաժշտական տեսահոլովակը թողարկվել է 2016 թվականի մարտին։ 2016 թվականի օգոստոսին Այլիշը պայմանագիր է կնքել The Darkroom ձայնագրման լեյբլի հետ, որն Interscope Records-ի դուստր ընկերությունն էր։ Ջասթին Լաբլիները, որն Այլիշին ստորագրել է The Darkroom-ի հետ, զարգացրել է նրան որպես արտիստի, ոգեշնչվելով հիփ հոփ արտիստներ Թրևիս Սքոթի և Chance the Rapper-ի ոճերով՝ ուշադրություն դարձնելով ոչ միայն սինգլներին, այլ նաև կենտրոնանալով «անձ և առանձին էսթետիկա» ստեղծելու վրա^[30]։

«Ocean Eyes»-ի պարային տեսահոլովակը թողարկվել է 2016 թվականի նոյեմբերին, և երգը վերաթողարկվել է ամբողջ աշխարհում Darkroom-ով և Interscope-ով^[31]։ Նույն թվականին Այլիշը նաև թողարկել է «Six Feet Under» սինգլը, որի պրեմիերան կայացել է Apple Music-ի Beats 1 ռադիո շոուի ժամանակ^[24][32]։ Ocean Eyes»-ը պլատինե է հավաստագրվել Ձայնագրող ընկերությունների ամերիկյան ասոցիացիայի կողմից 2018 թվականի սեպտեմբերին^[33] և 2019 թվականի մայիսին 84-րդ հորիզոնականը զբաղեցրել Billboard Hot 100-ում^[34]։

2017 թվականի հունվարի 14-ին Այլիշը թողարկել է մինի ալբոմ «Ocean Eyes»-ի 4 ռեմիքսներով^[35]։ «Ocean Eyes»-ի ռեմիքսների հաջողությունից հետո Այլիշը 2017 թվականի փետրվարի 24-ին թողարկել է «Bellyache» սինգլը^[36]։ Դրա տեսահոլովակը թողարկվել է 2017 թվականի մարտին։ Նույն ամսին, Այլիշը թողարկել է «Bored» թրեքը՝ որպես Նեթֆլիքսի «13 պատճառ՝ ինչու» հեռուստասերիալի սաունդթրեքի մի մաս^[37]։ Մարտին, Apple Music-ի շնորհիվ Այլիշը հայտնվել է South by Southwest երաժշտական փառատոնին^[25]։ 2017 թվականի հունիսին նա թողարկել է «Watch» սինգլը^[38], որին 2017 թվականի հուլիսին հետևել է «Copycat» սինգլը։ Դրա հետ մեկտեղ հայտարարվել է Այլիշի դեբյուտային մինի ալբոմի՝ «Don't Smile at Me»-ի, թողարկման մասին^[39]։ Հուլիսի ամեն ուրբաթ թողարկվում էր մինի ալբոմից մեկ նոր սինգլ։ Այդ սինգլների թվում են «Idontwannabeyouanymore»-ն և «My Boy»-ը, որոնք RIAA-ի կողմից ոսկե են հավաստագրվել։ «Don't Smile at Me»-ն թողարկվել է 2017 թվականի օգոստոսին^[40]։ Մինի ալբոմն Այլիշին «լրջաբույս փոփ աստղից» դարձրել է «մուգ փոփ արտիստ»։

Այլիշի թիմն աշխատել է Spotify-ի հետ, որն ավելացրել է նրան իր ամենահայտնի՝ «Today's Top Hits» փլեյլիստը։ The Baffler-ը նկարագրել է Այլիշի ձայնը որպես «սթրիմբայթ» ժանրում տեղավորվող և կազմված մեծամասամբ «միջին տեմպով, մելանխոլիկ փոփից», որը ոգեշնչվել է Լանա Դել Ռեյից, որի «երգելու ոճը, մռայլությունը և հիփ հոփից ներշնչված արտադրությունը» էսթետիկ է թվում^[41]։ Այլիշի առևտրային հաջողությունը բացատրվում է նրա համագործակցությամբ Spotify-ի հետ։ 2017 թվականի սեպտեմբերին Apple Music-ն անվանել է Այլիշին իր Up Next արտիստ, որին հաջորդել են կարճամետրաժ վավերագրական ֆիլմ, մինի ալբոմի կենդանի սեսիաներ և Beats 1 ռադիոկայացում Զեյն Լոուիի հետ հարցազրույց^[42]։ Նույն ամսին թողարկվել է «Up Next Session: Billie Eilish» կենդանի ձայնագրությամբ մինի ալբոմը։ 2017 դեկտեմբերին Այլիշը թողարկել է «&Burn» անվանմամբ իր համագործակցությունն ամերիկացի ռեփեր Վինս Սթեյփլզի հետ, որը մինի ալբոմի լայն տարբերակում թողարկված «Watch» երգի ռեմիքսն էր^[43]։

2018-ներկա․ «When We All Fall Asleep, Where Do We Go?»

2018 թվականի փետրվարին Այլիշը հայտարարել է Where's My Mind շրջագայության մասին, որն ավարտվել է 2018 թվականի ապրիլին^[44]։ Record Store Day 2018-ի համար Այլիշը թողարկել է 7" վինիլ՝ իր «Party Favor» երգի ակուստիկ տարբերակով և Դրեյքի «Hotline Bling»-ի ակուստիկ քավերով^[45]։ Նա համագործակցել է ամերիկացի երգիչ Քալիդի հետ «Lovely» սինգլում, որը թողարկվել է 2018 թվականի ապրիլին և ներառվել է «13 պատճառ՝ ինչու»-ի սաունդթրեքում^[46]։ «Lovely»-ն պլատինե է հավաստագրվել ԱՄՆ-ում^[47]։ Նա նաև թողարկել է «Bitches Broken Hearts» և «You Should See Me in a Crown» երգերը^[48], որոնցից վերջինը ներառվել է FIFA 19 տեսախաղի սաունդթրեքում։ 2018 թվականի հուլիսին Այլիշը հանդես է եկել Mo Pop Festival-ում^[49]։ 2018 թվականի հոկտեմբերին նա թողարկել է «When the Party's Over» սինգլը^[50] և պայմանագիր է կնքել Next Management նորաձևության ընկերության հետ հետագա համագործակցությունների համար^[51][52]։ Նա տեղադրվել է Ֆորբսի «30 Under 30» ցանկում նույն տարվա նոյեմբերին^[53][54] և թողարկել է «Come Out and Play» սինգլը, որը գրված էր Apple-ի արձակուրթային թեմայով գովազդի համար^[55]։

2019 թվականի հունվարի վերջին Այլիշի «Don't Smile at Me» մինի ալբոմը 1 միլիարդ սթրիմներ է հավաքել Spotify-ում՝ դարձնելով նրան ամենաերիտասարդ արտիստը, որը կարողացել է հասնել այդ քանակին։ Նույն ամսին Այլիշը թողարկել է «Bury a Friend» երգը որպես սպասվող դեբյուտային ալբոմի՝ «When We All Fall Asleep, Where Do We Go?»-ի երրորդ սինգլ^[56][57]։ Դրա հետ մեկտեղ թողարկվել է նաև «When I Was Older» սինգլը, որը ներշնչվել է 2018 թվականի Ռոմա ֆիլմից։ Այն հայտնվել է «Music Inspired by the Film Roma» հավաքածու ալբոմում^[58][59]։ «Bury a Friend»-ը զբաղեցրել է Billboard Hot 100-ի 14-րդ հորիզոնականը։ Փետրվարին, Այլիշը համագործակցել է ՅուԹյուբի հետ «Գրություն Բիլլիի գլխում» վավերագրական մինի սերիալի համար^[60][61]։ Ալբոմի չորրորդ սինգլը՝ «Wish You Were Gay»-ը, թողարկվել է 2019 թվականի մարտի 4-ին^[62] և դեբյուտել է ԱՄՆ-ի չարթի 31-րդ հորիզոնականին՝ պլատինե հավաստագրվելով RIAA-ի կողմից^[63]։

«When We All Fall Asleep, Where Do We Go?» ալբոմը թողարկվել է 2019 թվականի մարտի 29-ին^[60][64]։ Լոս Անջելեսում Spotify-ն «ալբոմի հետ աշխատելու լայն հնարավորություններ» է ծավալել, որոնք ներառում էին տարբեր ստեղծագործական աշխատանքներ ամեն մի թրեքի վրա^[60]։ Ալբոմը գլխավորել է Billboard 200, UK Albums Chart չարթերը և դարձրել է Այլիշին 2000-ական թվականներին ծնված առաջին արտիստը, որի ալբոմն ԱՄՆ-ում առաջին տեղն է զբաղեցրել, և երբևիցե ամենաերիտասարդ արտիստուհին, որի ալմոբն առաջին տեղն է զբաղեցրել Մեծ Բրիտանիայում^[65][66]։ Ալբոմի թողարկումից հետո Այլիշը ռեկորդ է սահմանել․ նա միակ կին արտիստն էր, որի 14 երգերը ընդգրկվել են Hot 100 չարթում^[67]։ Ալբոմի հինգերորդ՝ «Bad Guy» սինգլը թողարկվել է ալբոմի հետ համատեղ։ Երգի ռեմիքսը Ջասթին Բիբերի մասնակցությամբ թողարկվել է 2019 թվականի հուլիսին^[68][69]։ Օգոստոսին «Bad Guy»-ը գլխավորել է ԱՄՆ-ի չարթը՝ երկրորդ հորիզոնական տեղափոխելով Լիլ Նաս Էքսի «Old Town Road»-ը, որը ռեկորդային 19 շաբաթ շարունակ գլխավորում էր այս չարթը^[70][71]։ Այլիշը 2000-ական թվականներին ծնված միակ և Լորդից («Royals» երգով) ի վեր ամենաերիտասարդ արտիստն, որը համար մեկ սինգլ ունի^[72]։

Այլիշը սկսել է իր When We All Fall Asleep շրջագայությունը 2019 թվականի ապրիլին՝ Կոաչելլա փառատոնում^[73]։ Շրջագայության ավարտը նախատեսվել է 2019 թվականի նոյեմբերի 17-ին Մեխիկոյում։ 2019 թվականի օգոստոսին Այլիշը համագործակցել է Apple Music-ի հետ երաժշտական՝ «Remix Billie Eilish» աշխատարանի համար, որի ընթացքում նրա երկրպագուները կարող են վերստեղծել «You Should See Me In A Crown» երգը և սովորել ձայնագրել իրենց սեփական ռեմիքսները^[74][75]։ 2019 թվականի սեպտեմբերի 27-ին Այլիշը հայտարարել է Where Do We Go? World Tour-ի մասին իր ինստագրամյան կայքէջում^[76]։ Շրջագայության սկիզբը նախատեսված էր 2020 թվականի մարտի 9-ին Մայամիում, իսկ ավարտը՝ 2020 թվականի հուլիսի 27-ին Լոնդոնում^[77]։

2019 թվականի նոյեմբերի 13-ին Այլիշը թողարկել է իր հաջորդ՝ «Everything I Wanted» սինգլը^[78]։ 2019 թվականի նոյեմբերի 20-ին նա առաջադրվել է 6 Գրեմմի մրցանակների՝ «Տարվա ձայնագրություն» և «Տարվա երգ» անվանակարգերում «Bad Guy» երգի համար, «Տարվա ալբոմ»՝ «When We All Fall Asleep, Where Do We Go?» ալբոմի համար և «Լավագույն նոր արտիստ»։ 17 տարեկան հասակում նա դարձել է ամենաերիտասարդ արտիստը, որն առաջադրվել է 4 գլխավոր անվանակարգերում^[79]։ Նույն ամսին Այլիշը Billboard-ի կողմից «Տարվա կին» է ճանաչվել^[80]։ 2020 թվականի հունվարի 14-ին հայտարարվել է, որ Այլիշը կդառնա Ջեյմս Բոնդի մասին 25-րդ՝ «Մահանալու ժամանակը չէ» ֆիլմի գլխավոր նույնանուն երգի կատարողը, որի հեղինակը և պրոդյուսերը նրա եղբայրն էր^[81]։ Այս հայտարարությամբ Այլիշը դարձել է ամենաերիտասարդ արտիստը, որը հանդես է գալու Ջեյմս Բոնդի համար երգով^[82]։ Երգը թողարկվել է 2020 թվականի փետրվարի 13-ին^[83]։ Կարճ ժամանակ անց այն դարձել երկրորդ Բոնդի երգը, որը գլխավորել է բրիտանական պաշտոնական չարթերը։ Այն նաև Այլիշի առաջին համար մեկ սինգլն էր Մեծ Բրիտանիայում^[84]։

Գրեմմի 62-րդ մրցանակաբաշխության ժամանակ Այլիշը դարձել է ամենաերիտասարդ արտիստը և առաջին կինը, որը նույն տարի կարողացել է արձանիկի արժանանալ բոլոր 4 հիմնական անվանակարգերում^[85][86]։

COVID-19 պանդեմիայի ընթացքում Այլիշը և Օ'Քոնելը մասնակցել են ինչպես iHeart Media-յի Living Room Concert for America (անգլ. թարգմանաբար՝ «Հյուրասենյակային համերգ Ամերիկայի համար»)^[87], այնպես էլ Global Citizen-ի Together at Home (անգլ. թարգմանաբար՝ «Տանը միասին») համերգաշարերին՝ վերջինիս համար կատարելով Բոբի Հեբի «Sunny» երգը^[88]։ Երկու վիրտուալ համերգներն էլ փորձ էին հիվանդության դեմ պայքարելու համար միջոցներ ներգրավել և բարձրացնել իրազեկությունը։

Էյվերի Սթոունը Noisey-ից նկարագրել է Այլիշի սոպրանո վոկալը որպես «եթերային»^[89], իսկ Մորա Ջոնսթոնը Rolling Stone-ից բնութագրել է այն որպես «շշնջող»^[90]։ Դուրեն Սընթ Ֆելիքսը The New Yorker-ից նշել է, որ նա ունի «խռպոտ, անհասկանալի ձայն»^[91]։ Երաժշտական քննադատ Ռոբերթ Քրիսթգաուն գրել է, որ չնայած այն բանին, որ Այլիշը և երաժշտական, և առևտրային առումով փոփ է, նրա բրենդը նաև «հիշեցնում է, թե որքան ամորֆ է այն [փոփը] դարձել»։ Նա նկարագրել է երգչուհու սոպրանոն որպես «գիմնաստիկայի համար շատ մանրանկարչական վոկալային» և ավելացրել է, որ Այլիշը «դեռահասական գոթի ուրախ տարբերակ» է, և նրա «էլետկրա-հագեցած դեբյուտային ալբոմը» գերում է մեծ լսարանին^[92]։ Նրա երաժշտությունը ներառում է ալտերնատիվ փոփ^[93], դարք փոփ^[94], էլեկտրոփոփ^[93], EDM^[95], ինդի փոփ^[93][96], փոփ^[97] և էմո փոփ^[98] ժանրերը։

Այլիշը և նրա եղբայրը համագործակցում են երգեր գրելիս^[99][100]։ Այլիշն անվանում է Ֆինիսին երաժշտության ստեղծման իր գործընկեր^[99]։ Վերջինս օգնում է գրել երգչուհու ալբոմները, պրոդյուսերավորում է նրա երաժշտությունը և նաև հանդես է գալիս նրա հետ կենդանի շոուներում^[100][101]։ Այլիշը նաև ասել է, որ երգերի մի մասը ստողծվել է Ֆինիսի փորձից^[100]։ Նրանք փորձում են գրել «իսկապես հետաքրքիր և երկխոսական» տեքստեր^[100][102]։ Երբ Ֆինիսը գրում է Այլիշի հետ, նա փորձում է «օգնել նրան պատմել այն պատմությունը, որը նա փորձում է պատմել, լսում է նրա գաղափարները և օգտագործում է այն լեզուն, որը սազում է նրա պատմությունն արտահայտելու համար»^[102]։

Այլիշն ցանկանում էր իր տեսահոլովակների ռեժիսորը լինի դեռ 14 տարեկան հասակում, սակայն, նա չի ունեցել այդ հնարավորությունը փորձի պակասի պատճառով^[103]։ 2019 թվականին երգչուհին դարձել է իր «Xanny» սինգլի տեսահոլովակը ռեժիսորը^[104]։

Բիլլին ասել է, որ Ավրորա երգչուհու «Runaway» երգն է ներշնչել նրան երաժշտությամբ զբաղվել^[105][106]։ Այլիշի սիրելի ժանրը և ոգեշնչման ամենամեծ աղբյուրը հիփ հոփն է^[107]։ Նա նշել է Tyler, the Creator-ին, Childish Gambino-ին և Ավրիլ Լավինին որպես իր վրա հիմնական ազդեցություն թողած երաժիշտներ^[108][109]։ Նրանցից բացի նա նաև նշել է Իրլ Սուիթշորթին, Էմի Ուայնհաուսին, Spice Girls-ը և Լանա Դել Ռեյին^{[110][111][112][113]}։ Լրագրողները նրան հաճախ համեմատում են Լավինի, Լորդի և Դել Ռեյի հետ^[114][115]։ Սակայն Այլիշը հայտնել է, որ չի ուզում, որ նրան համեմատեն վերջինիս հետ, քանի որ «Այդ կինն [Լանա Դել Ռեյը] իր բրենդն անթերի է ստեղծել իր ամբողջ կարիերայի համար և պարտավոր չէ լսել սա»^[116]։ Նա նաև նշել է Ռիհաննային որպես իր ոճի ընտրության համար ոգեշնչման աղբյուր^[117]։ 2019 թվականին Այլիշն ասել է, որ հիանում է Արիանա Գրանդեով իր վոկալային հնարավորությունների համար, ավելացնելով, որ Գրանդեի «Thank U, Next» ալբոմը ներշնչել է նրան շարունակել երաժշտություն ստեղծել^{[118][119][120]}։

Այլիշի հանդեպ մեդիայի ուշադրության մեծ մասը կապված է նրա ոճի հետ, որի հիմնական մասն է կազմում պարկանման, լայն հագուստը^{[26][121][122]}։ 2017 թվականին Այլիշը հայտարարել է, որ իրեն դուր է գալիս հագնվել իր հարմարավետության գոտուց դուրս։ Այդպես նա զգում է, որ գրավում է շրջապատի ուշադրությունը^[123]։ Նա փորձել է «տարբերվել մարդկանց մեծամասնությունից» և ընտրել է այնպիսի հագուստ, որը հակառակն էր այն բանին, ինչ շատերը հագնում էին։ Նպատակ ունենալով «հիշվող տեսք ունենալ», Այլիշն ասել է, որ «ապացուցում է մարդկանց, որ նա ավելի կարևոր է, քան նրանք կարծում են» և սիրում է լինել «մի քիչ երկյուղելի, որ մարդիկ լսեն»^[124][125]։ 2019 թվականին նա ասել է․ «Ժամանակի ընթացքում դա սովորական է դառնում, «Բիլլի Այլիշ՝ սողացող, տարօրինակ, սարսափելի աղջիկ»։ Եվ դա իմ դուրը չի գալիս։ Դա համոզիչ չէ։ Ես պարզապես չեմ ուզում նույնը մնամ»^[126]։ Դրանից հետո Այլիշը հայտնվել է Calvin Klein-ի հագուստով, հայտարարելով, որ լայն, պարկանման հագուստ է կրում մարդկանց իրենց մարմիններից ամաչելուց զերծ պահելու համար և ասելով․ «Ոչ ոք չի կարող ասել․ «Նա շատ նիհար է», «Նա նիհար չէ», «Նա հարթ հետույք ունի», «Նա հաստ հետույք ունի»։ Ոչ ոք չի կարող ասել, քանի որ նրանք չգիտեն»^[127][128]։

Ըստ Քենեթ Ուոմաքի՝ 2019 թվականին Այլիշը «ոչնչացրել է իր իրավունքը լինել էլեկտրոփոփի թագուհի» իր դեբյուտային ալբոմով և «անվանվել է հետագա դեռահասային վախերով պաստառների երեխա։ Սակայն, ճիշտն ասած, նա այդպիսինը չէ»^[129]։

2019 թվականի ապրիլին Այլիշը «You Should See Me in a Crown» երգի տեսահոլովակից ներշնչված հագուստ է թողարկել Տակասի Մուրակամիի հետ համագործակցությամբ^[130][131]։ Տեսահոլովակի ռեժիսորը նույնպես Մուրակամին էր^[132]։ Թողարկվել է նաև Բիլլիի վինիլային արձանիկը^[133]։ Այլիշը նաև համագործակցել է Adobe Creative Cloud-ի հետ գովազդների շարքի համար^[134][135], որի համաձայն օգտատերերը կարող էին տեղադրել իրենց աշխատանքները «#BILLIExADOBE» հեշթեգով^[136][137]։ Այլիշը մասնակցել է 2019 թվականի մայիսի Calvin Klein-ի «I Speak My Truth In #MyCalvins» գովազդային արշավի մեկնարկին^[138][139]։ Նա նաև մասնակցել է Ad Council-ի «Seize the Awkward» արշավին՝ հոգեկան առողջության իրազեկման կողմնորոշման համար^[140][141]։ 2019 թվականի հուլիսին Այլիշը համագործակցել է Լոս Անջելեսում ծավալվող Freak City բրենդի հետ՝ հագուստի գծի թողարկման համար^{[142][143][144]}։ Նույն ամսին նա հայտնվել է Chanel-ի ընթրիքին՝ բրենդի փոփ ափը նշելու համար^[145][146]։

2019 թվականի օգոստոսին Բիլլի Այլիշը համագործակցել է Apple-ի հետ, ինչի արդյուքնում Apple Store-ի օգտատերերը կարող էին փորձեր անել «You Should See Me in a Crown»-ի հետ երաժշտական աշխատարանի ժամանակ^[147]։ Այլիշի համագործակցությունը Siberia Hills հագուստի ընկերության հետ^[148][149] տարաձայնություններ է առաջացրել, քանի որ ընկերությանը մեղադրում էին Love Live!-ից պլագիատ անելու մեջ^[150]։ Բրենդը հաստատել է, որ Այլիշը կապ չի ունեցել պլագիատի հետ^[151][152]։

2020 թվականի սկզբի դրությամբ Այլիշն ապրում է ծնողների հետ Highland Park-ում՝ Լոս Անջելեսի հյուսիսարևելյան մասում^[153]։

Նա հայտնել է, որ Տուրետի համախտանիշ^[154] և սինեսթեզիա^[155][156] ունի, ինչպես նաև որոշ ժամանակ տառապել է դեպրեսիայով^[157]։ Այլիշը դեռ փոքրուց բուսակեր է եղել^[158][159]։

Ստուդիական ալբոմներ

Հեդլայն

• Don't Smile at Me Tour (2017)^[160]
• Where's My Mind Tour (2018)
• 1 by 1 Tour (2018-2019)^[161]
• When We All Fall Asleep World Tour (2019)^[162]
• Where Do We Go? World Tour (2020)

Բացող ելույթ

• Florence and the Machine՝ High as Hope Tour (2018-2019)^[161]

Բիլլի Այլիշը մի շարք մրցանակների դափնեկիր է, ներառյալ 7 Գրեմմի, 2 American Music Awards, 2 MTV Europe Music Awards, 3 MTV Video Music Awards, 1 NRJ Music Award և 1 Brit Awards, ինչպես նաև Գինեսի կրկնակի ռեկորդակիր։