பன்னாட்டு புக்கர் பரிசு

பன்னாட்டு புக்கர் பரிசு (International Booker Prize), முன்னதாக மான் புக்கர் பன்னாட்டுப் பரிசு (Man Booker International Prize) என்பது ஐக்கிய இராச்சியத்தில் பன்னாட்டளவில் வழங்கப்படும் இலக்கிய விருதுகளில் ஒன்றாகும். இது 2004 யூன் முதல், மேன் புக்கர் பரிசுடன் சேர்த்து பன்னாட்டுப் பரிசாக அறிமுகம் செய்யப்பட்டது.^[1] மேன் குழுமத்தின் நிதியுதவியுடன், 2005 முதல் 2015 வரை, ஆங்கிலத்தில் வெளியிடப்பட்ட அல்லது பொதுவாக ஆங்கில மொழிபெயர்ப்பில் கிடைக்கும் ஒரு படைப்பிற்காக எந்தவொரு தேசிய இனத்தைச் சேர்ந்த எழுத்தாளருக்கும் இரண்டு ஆண்டுகளுக்கு ஒருமுறை இவ்விருது வழங்கப்பட்டது.^[2] இது ஒரு நூலாசிரியரின் "தொடர்ச்சியான படைப்பாற்றல், மேம்பாடு மற்றும் உலக அரங்கில் புனைகதைக்கான ஒட்டுமொத்த பங்களிப்பு",^[3] அத்துடன் எந்த ஒரு தலைப்பையும் விட எழுத்தாளரின் பணிக்கான அங்கீகாரமாக இருந்தது.

பன்னாட்டு புக்கர் பரிசு International Booker Prize
முதன்முதலில் இப்பரிசு வென்ற இசுமாயில் காதர்
விருது வழங்குவதற்கான காரணம்	சிறந்த ஆங்கில (அல்லது ஆங்கில மொழிமாற்றத்திற்குரிய) நூல்
நாடு	ஐக்கிய இராச்சியம்
வழங்குபவர்	புக்கர் பரிசு அறக்கட்டளை
வெகுமதி(கள்)	£50,000
முதலில் வழங்கப்பட்டது	2005; 19 ஆண்டுகளுக்கு முன்னர் (2005)
இணையதளம்	thebookerprizes.com/the-international-booker-prize

2016 ஆம் ஆண்டு முதல், ஆங்கிலத்தில் மொழிபெயர்க்கப்பட்டு ஐக்கிய இராச்சியம் அல்லது அயர்லாந்தில் வெளியிடப்பட்ட ஒரு புத்தகத்திற்கு ஆண்டுதோறும் இவ்விருது வழங்கப்பட்டு வருகிறது. இப்பரிசினை வென்ற நூலுக்கு £50,000 வழங்கப்படுகிறது. இது எழுத்தாளருக்கும், மொழிபெயர்ப்பாளரிற்கும் இடையே சமமாகப் பகிர்ந்து கொள்ளப்படுகிறது.^[4][5]

சர் மைக்கேல் மோரிட்சு, அவரது மனைவி ஆரியட் எய்மன் ஆகியோரின் "கிரான்க்சுடார்ட்" என்ற தொண்டு நிறுவனம் புக்கர் பரிசுகளுக்கு 2019 சூன் 1 முதல் ஆதரவளித்து வருகிறது. இந்த நாளில் இருந்து இப்பரிசுகள் புக்கர் பரிசு, பன்னாட்டு புக்கர் பரிசு என்று அறியப்படுகிறது. புக்கர் பரிசு அறக்கட்டளைக்கும், பரிசுகளுக்கும் அவர்கள் அளித்த ஆதரவைப் பற்றி, மோரிட்சு பின்வருமாறு கருத்துரைத்தார்: "புத்தகத்தைப் படித்து நேரத்தைச் செலவிடாத ஒரு நாளை நம்மால் யாரும் நினைத்துப் பார்க்க முடியாது. புக்கர் பரிசுகள் என்பது சிறந்த புனைகதையிலிருந்து வரும் நுண்ணறிவு, கண்டுபிடிப்புகள், இன்பங்களைப் பற்றிய செய்திகளைப் பரப்புவதற்கான வழிகள்".