Ортакаранавірусы
Ортакаранавірусы — падсямейства сямейства каранавірусаў парадку Nidovirales[1].
Ортакаранавірусы | |
Выгляд вірыёну каранавірусу і ягонае сячэньне | |
Клясыфікацыя | |
---|---|
Надцарства | Вірусы |
Царства | Рыбавірусы |
Падцарства | Ортарнавірусы |
Тып | Incertae sedis |
Аддзел | Пісувірыкоты |
Кляса | Пісанівірусы |
Атрад | Nidovirales |
Сямейства | Каранавірусы |
Падсямейства | Ортакаранавірусы |
Род | * Альфакаранавірус
|
Бінамінальная намэнклятура | |
Orthocoronavirinae | |
Назва
Назва «каранавірус» паходзіць ад лацінскага слова corona і грэцкага κορώνη, якія перакладаюцца як карона ці галё. Пры разглядзе ў электронны мікраскоп вірыёна (заразнай формы віруса) можна ўбачыць абалонку зь вялікіх булавападобных атожылкаў, якія ўтвараюць падабенства сонечнай кароны. Такая марфалёгія фармуецца віруснымі пэпламэрамі — бялкамі на паверхні віруса[2][3], якія вызначаюць зваротнасьць(en) гаспадара(en).
Марфалёгія
Дыямэтар вірусных часьцінак складае каля 120 нм[4][5]. Вірусная абалонка складаецца зь ліпіднага двухслою з прымацаванымі структурнымі пратэінамі: мэмбранай (М), абалонкай (А) і шыпом (Ш)[6].
Унутры знаходзіцца нуклеакапсыд, утвораны шматлікімі копіямі нуклеакапсыднага бялку з адналанцужковым РНК-геномам пазітыўнай накіраванасьці[4][7]. Ліпідная двухслойная абалонка, мэмбранавыя бялкі і нуклеакапсыд абараняюць вірус, пакуль ён знаходзіцца па-за вузай[8].
Памер геному каранавірусаў вагаецца ад прыкладна 27 да 34 кіляпараў[9] — адзін з найбольшых паказьнікаў сярод РНК-вірусаў. Геном мае 5’ мэтыляваны навершнік і 3’ поліадэнілаваны хвост[4].
Размнажэньне
Заражэньне пачынаецца з уваходам вірусу ў арганізм і прымацаваньня шыповага пратэіну да рэцэптара вузы-гаспадыні. Пасьля гэтага пратэаза вузы ўскрывае і актывуе шыповы пратэін віруса, які пранікае ўнутар вузы эндацытозам ці простым зьліцьцём віруснай абалонкі з вузавай мэмбранай[10].
Трапіўшы ў вузу-гаспадыню, часьцінка вірусу скідае абалонку, і ейны геном трапляе ў цытаплязму[11]. РНК-геном каранавірусу мае 5’ мэтыляваны навершнік(en) і 3’ поліадэнілаваны хвост(en), што дазваляе РНК прымацоўвацца да вузавай рыбасомы дзеля трансьляцыі[4].
У геноме каранавірусу зашыфраваны таксама бялок РНК-залежная РНК-полімэраза (РзРп), які дапамагае віруснаму геному транскрыбавацца ў новыя копіі РНК, выкарыстоўваючы рэсурсы вузы. Бялок РзРп выпрацоўваецца першым; калі скончыцца трансьляцыя гена, у якім зашыфраваны РзРп, тэрмінатарны кадон(en) спыняе трансьляцыю. Гэта называецца ўкладзенай транскрыпцыяй(en). Неструктурныя бялкі канаравірусу выконваюць выпраўленьне памылак(en), якой бракуе ва ўласна энзымах РНК-залежнай РНА-полімэразы, забясьпечваючы дадатковую дакладнасьць пры ўзнаўленьні[9]. Геном рэплікуецца, і з усіх утвораных бялкоў фармуецца доўгі поліпратэін. Каранавірусы маюць неструктурны бялок — пратэазу — які адказвае за расшчапленьне(en) поліпратэіну. Дзякуючы гэтаму вірус здольны зашыфроўваць максымальную колькасьць генаў малым наборам нуклеатыдаў[4].
Перадача
Зь вядомых на 2020 рок каранавірусаў ад чалавека да чалавека перадаюцца прынамсі 7 відаў. Асноўны спосаб перадачы — паветрана-кропельным шляхам пры непасрэдным кантакце з асобай, якая кашляе ці чыхае[12].
Заражэньне каранавірусам прадухіляюць рэгулярнае мыцьцё рук, адмова ад ужываньня недагатаванага мяса, нашэньне мэдычнай маскі ў грамадзкім месцы, пазьбяганьне застуджаных людзей і ўстрыманьне ад наведваньня людных месцаў[13]. Нашэньне маскі не абараняе ад заражэньня напоўніцу[14].
Таксаномія
- Асноўны артыкул: Каранавірусы
Каранавірусы (Orthocoronavirinae) — падсямейства сямейства Coronaviridae парадку Nidovirales[15].
- Род: Альфакаранавірус
- Віды:
- Кажанавы каранавірус CDPHE15(species)
- Кажанавы каранавірус HKU10(species)
- Альфакаранавірус вялікага падкованоса HuB-2013(d)
- Чалавечы каранавірус 229E(species)
- Пацуковы каранавірус Лючэнь Рн(d)
- Тхаровы каранавірус(d)
- Норкавы каранавірус 1(species)
- Каранавірус кажаноў Miniopterus 1(species)
- Каранавірус кажаноў Miniopterus HKU8(species)
- Альфакаранавірус начніцы Рыкета Sax-2011(d)
- Альфакаранавірус Nyctalus velutinus SC-2013(d)
- Вірус эпідэмічнай дыярэі сьвіней(species)
- Каранавірус кажаноў Scotophilus 512(species)
- Каранавірус кажаноў Rhinolophus HKU2(species)
- Чалавечы каранавірус NL63(species)
- Штам кажанавага каранавірусу BtKYNL63-9b, зьвязаны з NL63(d)
- Альфакаранавірус 1(species)
- Віды:
- Род: Бэтакаранавірус
- Віды:
- Бэтакаранавірус 1(species)
- Каранавірус кітайскіх пацукоў HKU24(d)
- Чалавечы каранавірус HKU1(species)
- Мышыны каранавірус(species)
- Кажанавы Hp-бэтакаранавірус Чжэцьзян2013(d)
- Вожыкавы каранавірус 1(species)
- Каранавірус блізкаўсходняга рэсьпіраторнага сындрому(species)
- Каранавірус кажаноў Pipistrellus HKU5(species)
- Каранавірус кажаноў Tylonycteris HKU4(species)
- Каранавірус кажаноў Rousettus GCCDC1(d)
- Каранавірус кажаноў Rousettus HKU9(species)
- Каранавірус цяжкага вострага рэсьпіраторнага сындрому(species)
- Віды:
- Род: Гамакаранавірус
- Род: Дэльтакаранавірус
Эвалюцыя
Найбліжэйшы агульны продак (НАП) усіх каранавірусаў датаваны прыкладна 8000 да Н. Хр[16]. НАП альфакаранавірусаў зьявіліся каля 2400 да Н. Хр., бэтакаранавірусаў — каля 3300 да Н. Хр., гамакаранавірусаў — каля 2800 да Н. Хр., дэльтакаранавірусаў — каля 3000 да Н. Хр. Ідэальнымі гаспадарамі для эвалюцыянаваньня і пераносу каранавірусных генаў лічацца кажаны і птушкі як цеплакроўныя крылатыя хрыбетныя[17].
У канцы XVIII стагодзьдзя з конскіх каранавірусаў вылучыўся каранавірус буйной рагатай скаціны[18] (бэтакаранавірус 1). У 1950-х роках аддзяліліся каранавірус буйной рагатай скаціны, сабачыя каранавірусы і чалавечы каранавірус OC43[19][20].
Чалавечы каранавірус NL63 і кажанавыя каранавірусы мелі НАП 5—9 стагодзьдзяў таму[21]. Каранавірус БУРС, хоць і блізкі да некалькіх відаў каранавірусаў кажаноў, аддзяліўся ад іх некалькі стагодзьдзяў таму[22]. Найбліжэйшы каранавірус кажаноў і каранавірус ЦВРС разьдзяліліся ў 1986 року[23].
Адкрыцьцё каранавірусаў адбылося ў 1960-х роках[24]. Сьпярша былі выяўленыя вірус інфэкцыйнага бранхіту ў курэй і яшчэ два ў людзей з застудай (пазьней яны стануць вядомыя пад назвамі чалавечы каранавірус 229E і чалавечы каранавірус OC43)[25]. У XXI стагодзьдзі былі ідэнтыфікаваныя новыя каранавірусы: ЦВРС (2003), NL63 (2004), HKU1 (2005), БУРС (2012), ЦВРС-2 (2019) — часьцей за ўсё праз масавыя ўспышкі вострых рэсьпіраторных інфэкцыяў.
Захворваньні
Фактары рызыкі розных каранавірусаў значна вагаюцца ад параўнальна бясшкодных (звычайная застуда) да 30%-ай сьмяротнасьці (каранавірус блізкаўсходняга рэсьпіраторнага сындрому)[4]. Каранавірусы выклікаюць застуды зь яўнымі сымптомамі: ліхаманкай, болем у горле ад набраклых адэноідаў — пераважна ўзімку і раньняй вясною[26]. Могуць выклікаць пнэўманію і бранхіт[27]. Выяўлены ў 2003 року каранавірус цяжкага вострага рэсьпіраторнага сындрому адрозьніваецца ўнікальным патагенэзам, паколькі выклікае запаленьні як верхніх(en), так і ніжніх дыхальных шляхоў(en)[27].
Вядомыя сем штамаў чалавечых каранавірусаў:
- Чалавечы каранавірус 229E (ЧКаВ-229E)
- Чалавечы каранавірус OC43 (ЧКаВ-OC43)
- Каранавірус цяжкага вострага рэсьпіраторнага сындрому (ЦВРС-КаВ)
- Чалавечы каранавірус NL63 (ЧКаВ-NL63, Нью-Гэйвэнскі каранавірус)
- Чалавечы каранавірус HKU1
- Каранавірус блізкаўсходняга рэсьпіраторнага сындрому (БУРС-КаВ)
- Каранавірус цяжкага вострага рэсьпіраторнага сындрому-2 (ЦВРС-КаВ-2), раней называны 2019-нКаВ або «новы каранавірус-2019»
Каранавірусы ЧКаВ-229E, -NL63, -OC43 і -HKU1 цыркулююць па сьвеце пастаянна і выклікаюць рэсьпіраторныя інфэкцыі у дарослых і дзяцей[28].
Успышкі
Адбывалася некалькі ўспышак каранавірусных інфэкцыяў параўнальна высокай сьмяротнасьці:
Успышка | Вірус | Сьмерці |
---|---|---|
Успышка цяжкага вострага рэсьпіраторнага сындрому 2003 году | Каранавірус ЦВРС | 774[29] |
Успышка блізкаўсходняга рэсьпіраторнага сындрому 2012 году | Каранавірус БУРС | Больш за 400[30] |
Успышка блізкаўсходняга рэсьпіраторнага сындрому 2015 году | Каранавірус БУРС | 36[31] |
Успышка блізкаўсходняга рэсьпіраторнага сындрому 2018 году | Каранавірус БУРС | 41[32] |
Пандэмія каранавіруснай інфэкцыі 2019—2020 гадоў | Каранавірус ЦВРС-2 | >468 000[33] |
Крыніцы
Вонкавыя спасылкі
- Каранавірус: апошнія навіны // Беларускае тэлеграфнае агенцтва, 17 красавіка 2020 г. Праверана 17 красавіка 2020 г.
- Каранавірусная хвароба-2019 // БелаПАН, 17 красавіка 2020 г. Праверана 17 красавіка 2020 г.
- Каранавірус // Газэта «Зьвязда», 17 красавіка 2020 г. Праверана 17 красавіка 2020 г.
- Каранавірус // Партал «Здаровыя людзі», 11 красавіка 2020 г. Праверана 17 красавіка 2020 г.
- Каронавірус // Газэта «Новы час», 17 красавіка 2020 г. Праверана 17 красавіка 2020 г.
- Пандэмія каранавірусу ў Беларусі і сьвеце // Радыё «Свабода», 17 красавіка 2020 г. Праверана 17 красавіка 2020 г.
- Каронавірус // Радыё «Спадарожнік», 17 красавіка 2020 г. Праверана 17 красавіка 2020 г.
- Каронавірус // Тэлеканал «Белсат», 17 красавіка 2020 г. Праверана 17 красавіка 2020 г.
- Кітайскі каранавірус // Эўрарадыё, 17 красавіка 2020 г. Праверана 17 красавіка 2020 г.